Sot protesta e Lapajt, Rama i vë ‘kyçin’ Kryeministrisë

Blindimi i godinës së Kryeministrisë është shndërruar tashmë në një praktikë të zakonshme sa herë që në Tiranë paralajmërohen protesta kombëtare. Hyrjet kryesore nga bulevardi “Dëshmorët e Kombit” mbulohen me panele metalike, një masë shtesë sigurie përtej pranisë së shtuar të forcave të Policisë së Shtetit dhe Gardës së Republikës, të angazhuara në mbrojtjen e selisë së qeverisë.

Rreth një ditë përpara protestës kombëtare të thirrur nga lëvizja “Shqipëria Bëhet”, e drejtuar nga Adriatik Lapaj, nën mbikëqyrjen e Gardës është vendosur edhe këtë herë blindimi i godinës së Kryeministrisë. Masa zakonisht aplikohet në rastet kur autoritetet kanë sinjale për tensione apo përplasje të mundshme, veçanërisht kur pritet pjesëmarrje e konsiderueshme.

Një skenar i ngjashëm u pa edhe gjatë protestës së fundit të organizuar nga Partia Demokratike më 24 janar, ku situata u përshkallëzua me hedhje molotovësh dhe fishekzjarresh, ndërsa policia reagoi me përdorimin e gazit lotsjellës për shpërndarjen e turmës.

Nga ana e tij, Lapaj ka bërë thirrje që protesta e së shtunës të jetë pa simbole partie dhe të marrë formën e një tubimi qytetar. Megjithatë, në muajt e fundit nuk kanë munguar incidentet mes aktivistëve të “Shqipëria Bëhet” dhe forcave të rendit, veçanërisht në rastet kur policia ka ndërhyrë për të larguar çadrat e improvizuara, karriget apo ngrohëset e vendosura gjatë natës nga protestuesit përballë Kryeministrisë.

Ende nuk dihet nëse gjatë protestës së planifikuar për të shtunën, e cila pritet të nisë në orën 18:00, autoritetet do të zbatojnë të njëjtat masa sigurie si në protestën e një jave më parë. Ajo që është e sigurt deri tani, është se godina qendrore e qeverisë është tashmë e blinduar, në pritje të zhvillimeve të radhës.