SPAK kërkon 12 vite burg për ish-ministrin e Brendshëm, caktohet seanca, ja kur jepet vendimi final për Saimir Tahirin

Prokuroria e Posaçme Kundër Korrupsionit ka kërkuar dënimin me 12 vite burg për ish-ministrin Saimir Tahiri. Ndërsa seanca e fundit u caktua më 4 shkurt ora 13:00, ditë kur do të jepet dhe vendimi final për Tahirin.

E njëjta masë është kërkuar edhe për ish-drejtorin e Policisë së Vlorës, Jaeld Çelën. Ndërkohë, ish-ministri Tahiri kërkoi pafajësi. Por për shkak të gjykimit të shkurtuar, SPAK ka kërkuar 8 vite burg për ish-zyrtarët.

Prokuroria e akuzoi asokohe Tahirin për trafik të narkotikëve dhe kërkoi arrestimin e tij, por shumica parlamentare socialiste e bllokoi kërkesën për arrestim dhe e sulmoi hetimin e prokurorisë si të njëanshëm.

Në shtator 2019, Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vjet burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar.

Ish-ministri i Brendshëm Saimir Tahiri nuk është ndalur gjatë për mediat pas seancës në Apelin e GJKKO. Ai ka falënderuar gazetarët dhe tha se pret vendimin, i cili siç u vendos në seancë do të jepet më 4 shkurt në orën 13:00.