SPAK nuk dorëzohet për Luan Dacin, rekurs në Gjykatën e Lartë

Prokuroria e Posaçme kundër Korrupsionit dhe Krimit të Organizuar ka bërë rekurs në Gjykatën e Lartë mbi vendimin e dhënë nga Gjykata e Posaçme e Apelit për anëtarin e Kolegjit të Posaçëm të Apelimit, Luan Daci.

Kujtojmë se Gjykata e Posaçme e Apelit rrëzoi vendimin e Shkallës së Parë për pezullim nga detyra të anëtarit të KPA. Luan Daci u akuzua nga SPAK për falsifikim dokumentesh, pasi ka fshehur shkarkimin nga detyra të gjyqtarit në vitin 1997, nga dosja e aplikimit për anëtar të KPA-së.

Më 20 maj, Gjykata e Posaçme e pezulloi atë nga detyra me kërkesë të SPAK. Më 25 maj 2020, KPA pezulloi shqyrtimin e çështjeve ku anëtar i trupës gjykuese ishte Luan Daci, deri në vendimin përfundimtar të Gjykatës së Posaçme Antikorrupsion.

KTHIMI NË DETYRË

Gjyqtari i KPA-së u vu nën akuzë për falsifikim dokumentesh gjatë aplikimit për postin e lartë në sistemin e drejtësisë. Por, sipas Gjykatës së Posaçme të Apelit, ky fakt nuk mund të pengojë që gjyqtari Luan Daci të vazhdojë të ushtrojë detyrën e tij në Kolegjin e Posaçëm e Apelimit, derisa Prokuroria e Posaçme të përfundojë hetimet.

“Asnjë normë ligjore nuk kërkon që akti i masës disiplinore të largimit nga puna të shënohet, se duhet treguar apo sidoqoftë të jetë në përmbajte të kërkesës së kandidatit për anëtar në institucionet e rivlerësimit, ky mosshënim, mostregim apo i çfarëdolloj forme e mohimit të tij, nuk shërben apo nuk është në gjendje të falsifikojë as dokumentin ‘kërkesë’, sepse është dokument që përfaqëson apo provon shprehjen e interesit për kandidim dhe preferencën e vendit vakant dhe as dokumentin e vendimit të Këshillit të Lartë të Drejtësisë, sepse nuk e ka ndryshuar, fshirë dhe nuk e ka prishur përmbajtjen e tij”, thuhet në vendimin e dhënë nga gjyqtari i Apelit, Dhimitër Lara, Nertina Kosova dhe Sokol Binaj.