SPAK përgënjeshtron lajmet për arrestimin e Engjëll Agaçit dhe zyrtarëve të Kryeministrisë

Prej disa orësh, në redaksitë e Tiranës dhe më gjerë po qarkullon një SMS mbi arrestimin e Sekretarit të Përgjithshëm të Këshillit të Ministrave, Engjëll Agaçi, si dhe disa drejtorëve në Kryeministri.

Burime të Publik.al u interesuan pranë SPAK për të verifikuar këtë informacion, dhe përgjigja zyrtare ishte e qartë: “Nuk ka asgjë të vërtetë në këtë lajm!”

SMS-ja e shpërndarë gazetarëve dhe redaksive:

• “Vec Agaçit, di gjë për kë kanë nxjerrë urdhërarresti SPAK? Se më thonë janë 4 drejtorë në Kryeministri.”
• “Dëm 50 milionë euro shtetit.”
• “Po thuhet se ka 12 masa arresti për në Kryeministri.”

Në realitet, nuk ka asnjë konfirmim zyrtar për këto pretendime. Nga verifikimet e bëra, rezulton se Engjëll Agaçi mban ende postin e Sekretarit të Përgjithshëm të Këshillit të Ministrave, ndërsa prej disa ditësh ndodhet në Itali për arsye shëndetësore.

Për momentin, çdo informacion tjetër mbetet i pakonfirmuar dhe i pabazuar në burime të besueshme. SPAK nuk ka bërë asnjë deklaratë lidhur me ndonjë masë arresti ndaj zyrtarëve të Kryeministrisë.