Spitali i Tepelenës do të mbyllet , qytetarët: Do vdesim!

Mjekëve të Spitalit të Tepelenës iu ka mbërritur një urdhër për mbylljen e spitalit që nga viti 2024 e në vazhdim dhe kthimin e tij në një spital ditor.

Por ata dhe qytetarët nuk janë dakord me një urdhër të tillë, të marrë pa u konsultuar dhe pa bërë një dëgjesë publike me vetë banorët.

Mjekët e këtij spitali, në një letër drejtuar kryeministrit Edi Rama, ministres së Shëndetësisë, Albana Koçiu dhe deputetëve e zyrtarëve të tjerë të zonës, kanë listuar arsyet pse ky spital nuk duhet mbyllur.

Ata thonë se janë rreth 38000 banorë nga Memaliaj e Tepelena që marrin shërbim spitalor në këtë spital dhe mbyllja e tij do ndikonte negativisht, kryesisht te fëmijët dhe të moshuarit.

Mjekët duke përmendur faktin se në këtë spital vizitat mjekësore janë shtuar përgjatë vitit 2023, kërkojnë rishqyrtimin e këtij vendimi bashkë me banorët që janë më të prekurit.

Këta të fundit janë tepër të shqetësuar pasi thonë se pa shërbim shëndetësor spitalor do të vdesin.