Tentoi të shpëtojë nga Vettingu, KPK merr vendim për Adriatik Llallën

Komisioni i Pavarur i Kualifikimit ka bërë të ditur sot se ka ndërprerë vettingun për Adriatik Llallën, pak ditë pasi ai refuzoi të marrë një pozicion në Gjykatën e Apelit siç ia jep edhe ligji për Prokurorinë.

“Pasi mori dijeni për dorëheqjen e subjektit të rivlerësimit, z. Adriatik Llalla, më datë 12.02.2018, në zbatim të nenit G të Aneksit të Kushtetutës, vendosi ndërprerjen e procesit të rivlerësimit për subjektin e rivlerësimit, Adriatik Llalla. Vendimi do të publikohet në faqen zyrtare të internetit të këtij institucioni në zbatim të afatit të përcaktuar në nenin 55/7 të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë””, thuhet në njoftimin e Komisionit të Pavarur të Kualifikimit.

Në përbërje të trupës gjykuese për këtë çështje kanë qenë Roland Ilia si kryesues dhe Pamela Qirko e Olsi Komici si anëtarë.

Tre ditë më parë refuzimin e marrjes së një posti në Gjyqësor nga Llalla e komentoi edhe ambasadori amerikan, Donald Lu, i cili tha se ish kryeprokurori nuk i shpëton dot vettingut.

“Tërheqja nuk i shfajëson këta ish-zyrtarë nga përgjegjësitë e mundshme penale për korrupsion apo shpërdorim detyre. Ata që kanë frikë nga vetting-u, duhet të kenë frikë edhe nga hetimet e pashmangshme penale”, theksoi ambasadori për News 24.