Thellohet tragjedia në Maliq, humb jetën edhe vogëlushja 6-vjeçare

Tragjedia e ndodhur më 19 tetor në Maliq është thelluar edhe më shumë, pasi numri i viktimave ka shkuar në tre. Në zjarrin që përfshiu banesën e familjes Hazisllari humbën jetën menjëherë nëna, Merjeme Azisllari, dhe djali i saj 14-vjeçar, Luka Hazisllari.

Pas disa ditësh luftë për jetën në Qendrën Spitalore Universitare “Nënë Tereza” në Tiranë, ka ndërruar jetë edhe vajza 6-vjeçare e familjes, Nefeli Hazisllari, e cila kishte pësuar djegie të rënda. Përpjekjet e mjekëve për ta mbajtur në jetë kanë rezultuar të pamjaftueshme.

Flakët përfshinë banesën brenda pak minutash, duke mos u lënë mundësi familjarëve të dilnin. Fillimisht, e vogla kishte arritur të shpëtonte duke u hedhur nga dritarja, ndërsa një fqinje i kishte ardhur në ndihmë pasi kishte dëgjuar zhurmat dhe thirrjet për ndihmë.

Sipas të dhënave të para të hetimit, zjarri dyshohet të ketë shpërthyer si pasojë e një sobe me dru. Fqinjët tregojnë se familja jetonte në kushte të vështira ekonomike dhe se të dy fëmijët ishin me autizëm.