Thellohet vjedhja e Ilir Beqes me Ermal Kurtulajn: 4 MLN euro me projektin fiktiv “EPHI” (Përmirëso Shërbimin Parësor)

Deri tani, në dosjen e SPAK për grupin “Beqja- Kurtulaj”, janë skeduar vjedhje në shëndetësi, fshehje aksionesh, tenderë me letra false dhe pastrim parash nëpërmjet shoqatave “Good Health” e “FIAA” të Ermal Kurtulajt dhe restoranteve të Ilir Beqjes, Ermal Mamaqit e Dhurata Thanasit.

Ilir Beqja ish-  Ministër Shëndetësie dhe vartësi i tij Ermal Kurtulaj, Drejtor Menaxhimi e Kontratash te Fondi i Kujdesit Shëndetësor, kanë kryer një vjedhje “të heshtur” me vlerë 4 milionë Euro.

Këtë vjedhje, ata e kanë realizuar nëpërmjet Projektit Shëndetësor “Përmirëso Kujdesin Parësor Shëndetësor”, të sajuar nga Ilir Beqja për gjoja rilindjen e shërbimit shëndetësor publik në qendrat shëndetësore dhe komunitetet e 10 qyteteve të vogla periferike.

Në programin e këtij projekti, ishte këshillimi për cilësi në shërbimin shëndetësor parësor, për popullatën e prekur nga epidemitë; për gatishmërinë e qendrave shëndetësore përmes mjediseve efikase; përvoja e mbikëqyrjes së sëmundjeve paralajmëruese, reagimi ndaj epidemive, përmbushja e misionit të punonjësve të shëndetësisë dhe aftësia e komunikimit me popullatën.

Projekti fiktiv është deklaruar me letra, sikur është zbatuar në bashkitë Kamëz, Pukë, Klos, Kuçovë, Kolonjë, Has, Tepelenë, Patos, Selenicë e Bulqizë, me fonde nga 400 mijë Euro, të cilat sipas dokumenteve, janë përdorur për të këshillat e shërbimit shëndetësor parësor të banorëve.

Drejtues në këtë projekt, ish-ministri Ilir Beqja emëroi vartësin e tij Ermal Kurtulaj, ndërsa koordinatore projekti emëroi Artjola Zaimin, sekretare te Spitali Amerikan.

Një projekt i tillë shëndetësor i quajtur “Enhancing Primary Health Care-Këlcyrë” (EPHIK), është zbatuar në Këlcyrë gjatë muajit korrik 2022 nga Komiteti i Përbashkët i Qeverive Shqiptaro-Italiane (IADSA) me vlerë 340 mijë Euro, nisur pas kërkesës që bëri Ministria e Shëndetësisë.

Por edhe këtë projekt shëndetësor me financim italian, ministrja Ogerta Manastirliu ia dha Ilir Beqjes; vërtetuar nga fakti, që Drejtues Menaxherial i projektit, ishte përsëri sekseri dhe vartësi i tij Ermal Kurtulaj, me pagë mujore 1.5 milionë lekë.