Thirrja për tubim në datën 2 mars/ Lefter Maliqi: E mbështes Metë

Deputeti i opozitës në Parlament, Lefter Maliqi tha sot se e mbështet thirrjen e Presidentit Ilir Meta për tubimin në datën 2 mars. “Unë e mbështes Metën dhe i bëj thirrje të gjithë socialistëve, demokratëve, të jenë në 2 mars por mos jenë protesta me drita ndezur, por të rrëzohet ky diktatori.

E mbështes vetëm për një fakt Metën, që ishte student i dhjetorit edhe pse më vonë i shërbeu PS-së. Të gjithë e dinë që po u kap Kushtetuta, do të njihen zgjedhjet moniste”. Ndërsa i ka drejtuar një thirrje Policisë së Shtetit, pas deklaratave të një dite më parë të ministrit Sandër Lleshaj që tha se Policia e Shtetit “duhet të hyjë në historinë e planetit si e para polici në botë që garanton tubimin antiqeveritar të kreut të shtetit”. “Në këtë manifetim të madh i bëj thirrje Policisë së Shtetit, që është në një vetting fallco dhe kryetare e saj është një grua që e ka burrin oficer të thjeshtë. Policia të përgjigjet si policia e 1991, të distancohet nga vendimet dhe thirrjet politike.

Dhe kujdes me gazin lotsjellës”. Për zgjidhjen e kësaj krize, Maliqi kërkoi edhe ndërhyrjen e ndërkomëtarëve. “Thirrja ime është e drejtpërdrejtë, në 2 mars e më pas të gjithë socialistët miqtë e mi, përkrahësit në Berat, por edhe kudo të jenë për fatet e vendit. Të fitojë më i miri, ndërkombëtarët të ndërhyjnë në mënyrë që të bëhet një zgjidhje politike sa më shpejt, mos ketë konfrontim fizik dhe vendi të kalojë në zgjedhje të lira të ndershme të parakohshme”.