Tiranë/Pak minuta para protestës, mblidhen protestuesit

Tashmë kanë mbetur rreth 30 minuta nga nisja e protestës. Qytetarët kanë nisur të mblidhen para selisë së PD-së dhe në bulevardin Dëshmorët e Kombit.

Pjesëmarrja është masive. Qytetarët kanë shprehur revoltën e tyre dhe pakënaqësitë nga qeverisja e Ramës për më shumë se një dekadë.

Tanimë pritet që të nisë marshimi drejt godinës së kryeministrisë dhe më pas do të shtrihet në të gjitha rrugët e kryeqytetit.

Më herët është raportuar se, pas kryeministrisë protestuesit do të ndalojnë te Bashkia e Tiranës dhe më pas tek ministria e Brendshme.

Disa dhjetëra efektivë të Policisë së Shtetit dhe një automjet i zjarrfikëses është stacionuar brenda rrethimit të Parlamentit, godinës ku zhvillohen seancat plenare.

Duket qartë pozicionimi i uniformave blu brenda rrethimit të Parlamentit, nga ana e pedonales.

Parlamenti është një nga institucionet ku mund të ketë një dyndje të protestuesve, që mund të lëvizin në rrugët e Tiranës, pasi të jenë mbledhur përpara godinës së Kryeministrisë.