Tiranë/Policia me plan masash; rrugët që do të bllokohen nga protesta e opozitës

Teksa opozita do të mbajë sot protestën e radhës para Bashkisë së Tiranës, policia ka ndërmarrë një seri masash për mbarëvajtjen e rendit dhe sigurisë.

Policia njofton bllokimin e disa rrugëve, plotësisht dhe pjesërisht. Blutë kanë bërë thirrje që të gjithë qytetarët të shmangin lëvizjen në këto akse rrugore dhe të përdorin rrugë alternative, deri në përfundim të tubimit.

“Për shkak të zhvillimit të një tubimi, ditën e sotme, në orën 11:00, përpara Bashkisë Tiranë, do të ketë bllokime të disa segmenteve rrugore, si dhe bllokime të pjesshme të disa segmenteve të tjera në varësi të lëvizjes së tubuesve.

Njoftojmë qytetarët se sot, prej orës 11:00 e deri në përfundim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës.

Policia apelon për të gjithë qytetarët që të shmangin lëvizjen në këto akse rrugore dhe të përdorin rrugë alternative, deri në përfundim të tubimit, si Unaza e Mesme dhe Unaza e Madhe”, njoftoi policia.