Tre socialistë të vjetër, Xhafa, Majko dhe Braçe abstenuan ligjin e kanabisit

Kuvendi i Shqipërisë miratoi me shumicë votash projektligjin për kontrollin e kultivimit dhe përpunimit të bimës së kanabisit për qëllime mjekësore dhe industriale. Ligji mori 69 vota pro, 23 kundër dhe 3 abstenime nga tre deputetë socialistë, Fatmir Xhafaj, Pandeli Majko dhe Erjon Braçe.

Qeveria shqiptare theksoi se ky projektligj synon rregullimin dhe mbikëqyrjen e kultivimit, përpunimit dhe eksportit të bimës së kanabisit, duke krijuar një institucion të veçantë për këtë qëllim. Autoritetet besojnë se një proces licensimi do të ndihmojë në rritjen e ekonomisë së vendit dhe do të sigurojë kontrollin e subjekteve që merren me këtë veprimtari.

Ligji parashikon krijimin e një agjencie të veçantë për kontrollin dhe regjistrimin e prodhimit të kontrolluar të kanabisit për qëllime mjekësore. Licensa do të jepet për një periudhë 15-vjeçare, me të drejtë rinovimi, dhe subjektet që kërkojnë licencën duhet të kenë përvojë të paktën 3-vjeçare në kultivim dhe përpunim të kanabisit për qëllime mjekësore. Licenca do të jepet pasi të verifikohen dhe plotësohen kushtet e saj çdo 3 vjet.

Megjithatë, opozita shprehu dyshime në lidhje me projektligjin, duke theksuar se ai mund të përdoret për të licencuar grupet kriminale. Tritan Shehu, deputeti opozitar, tha se ligji bie ndesh me Kodin Penal dhe synon përdorimin e drogave për trafiqe. Opozita gjithashtu kritikoi mungesën e një studimi të detajuar mbi përfitimet ekonomike në raport me rreziqet dhe pasojat sociale, shëndetësore dhe kriminale që sjell përdorimi i kanabisit.

Pavarësisht kritikave, shumica socialiste e miratoi projektligjin duke përsëritur se kontrolli do të jetë i rreptë dhe do të krijojë mundësi të mëdha për fitime financiare dhe punësim në vend. Ministria e Shëndetësisë do të ketë rolin kryesor në zbatimin e këtij ligji, por disa deputetë opozitarë shprehën dyshime për kapacitetet e duhura të ministrisë për ta zbatuar atë në mënyrë efikase.