Tri çështjet mbi të cilat po pyetet Damian Gjiknuri në SPAK

Ish-ministri i Infrastrukturës dhe Energjetikës, Damian Gjiknuri, ka mbi 2 orë që ndodhet në Prokurorinë e Posaçme.

Ish-ministri po pyetet në SPAK për tri çështje të rëndësishme, ajo e McGonigal, dosjen e inceneratorëve dhe për hetimin pasuror ndaj tij. 

Theksojmë se për dosjen “McGonigal”, Gjiknuri është i vetmi dëshmitar, pasi nën cilësinë e ministrit të Infrastrukturës dhe Energjetikës ka pranuar se ka takuar ish-agjentin e FBI-së, Charles McGonigal, ku është akuzuar për marrëveshjet e fshehta për fushat naftëmbajtëse në vend.

Në lidhje me çështjen “McGonigal” pritet të ketë një hetim dhe vendim nga SPAK-u. Sipas kërkesës së prokurorëve amerikanë dhe vendimit të gjykatës në SHBA, Charles McGonigal u dënua pas akuzave për interesa të qeverisë shqiptare kundër opozitës. 

Damian Gjiknuri në SPAK

Politikanët apo personat e përshirë në këtë aferë në Shqipëri nuk hetohen në SHBA, sepse nuk është korrupsion që është kryer në shtetin amerikan.

Çështja e dytë që po merret në pyetje Gjiknuri është afera miliona euroshe e inceneratorëve. Konkretisht bëhet fjalë për fraksion dosje për hetimet për inceneratorin e Elbasanit. 

Ndërkohë, ish-ministri po pyetet edhe në sajë të një hetimi pasuror ndaj tij të Prokurorisë së Posaçme. 

Nuk është hera e parë që ai thirret në Prokurorinë e Posaçme. Në shkurt të vitit të kaluar, Gjiknuri u pyet nga SPAK-u në lidhje me një kallëzim të bërë prej tij në vitin 2017, kur mbante pozicionin e ministrit të Infrastrukturës dhe Energjisë.

Kallëzimi ndaj ish-ministrit Gjiknuri ishte për abuzime në projektin e rrugës Tiranë-Elbasan që erdhi pas shkeljeve të konstatuara nga një raport auditi i ministrisë që drejtonte.