Tritoli në Fushë-Krujë, dyshohet se u vendos nga vetë Ylli Zalla

Detaje të reja po dalin nga hetimi për shpërthimin me lëndë plasëse në fshatin Zallë të Fushë-Krujës, ku një sasi tritoli shpërtheu në banesën e shtetasit Ylli Zalla, duke shkaktuar dëme materiale në godinë dhe duke djegur edhe një automjet.

Ngjarja dyshohet se ka ndodhur gjatë orëve të vona të mbrëmjes së së shtunës, ndërsa policia është vënë në dijeni vetëm paraditen e ditës së sotme. Njoftimi është bërë nga bashkëshortja e Ylli Zallës, e cila ndodhet në Itali.

Një element që vështirëson ndjeshëm hetimin është mungesa e kamerave të sigurisë në zonën ku ndodhet banesa. Për pasojë, nuk ka pamje filmike që mund të ndihmojnë grupin hetimor për të identifikuar personat që mund të kenë vendosur lëndën plasëse apo për të rindërtuar me saktësi momentet para dhe pas shpërthimit.

Megjithatë, hetuesit po shqyrtojnë edhe një pistë tjetër, e cila ngre dyshime mbi mënyrën se si është organizuar ngjarja. Burime policore bëjnë me dije se nuk përjashtohet mundësia që lënda plasëse të jetë vendosur nga vetë Ylli Zalla, duke e orientuar hetimin drejt një skenari të mundshëm të inskenimit.

Dyshimet janë shtuar edhe pas deklarimeve të bëra fillimisht nga bashkëshortja e tij. Ajo ka pretenduar se, përveç dëmeve të shkaktuara nga shpërthimi, në banesë ishte gjetur edhe një letër me përmbajtje kërcënuese. Më pas, sipas burimeve, ky pretendim është tërhequr, duke e bërë elementin e letrës pjesë të verifikimeve të grupit hetimor.

Një tjetër pistë që po shqyrtohet lidhet me mundësinë që Ylli Zalla të jetë larguar ilegalisht nga Shqipëria dhe që shpërthimi të jetë përdorur si pjesë e një skenari për të krijuar një situatë të pretenduar rreziku ndaj jetës. Sipas kësaj piste, ngjarja mund të jetë inskenuar me synimin për të kërkuar azil jashtë vendit, duke u paraqitur si person i kërcënuar.

Megjithatë, këto mbeten pista hetimore dhe deri në këtë fazë nuk ka një konkluzion zyrtar që të vërtetojë autorësinë apo motivin e shpërthimit.

Grupi hetimor vijon mbledhjen dhe verifikimin e provave për të përcaktuar se kush e vendosi lëndën plasëse, cili ka qenë motivi dhe nëse bëhet fjalë për një sulm të mirëfilltë apo për një ngjarje të inskenuar.