U bllokuan në lumin e Drinit të Zi, shpëtohen 7 persona në Bulqizë

Shtatë persona janë shpëtuar nga forcat e Policisë dhe strukturat e emergjencës pasi mbetën të bllokuar në rrjedhën e lumit Drini i Zi, në zonën e njohur si “Ura e Gjoricës” në Bulqizë. Ngjarja u shënua pas një rritjeje të menjëhershme të nivelit të ujit, e cila i la të izoluar në mes të rrjedhës.

Sipas informacionit zyrtar, alarmi u dha nga një prej qytetarëve të bllokuar, i cili kërkoi ndihmë pasi ai dhe gjashtë familjarë të tij nuk mundën të dilnin nga lumi për shkak të kushteve të rrezikshme të krijuara brenda pak minutash.

Menjëherë pas njoftimit, shërbimet e Komisariatit të Policisë Bulqizë u mobilizuan dhe shkuan drejt vendngjarjes, duke koordinuar ndërhyrjen me strukturat e Emergjencave Civile të Prefekturës Dibër dhe ekipet zjarrfikëse.

Operacioni i shpëtimit u realizua me përdorimin e gomoneve, përmes të cilave u bë e mundur nxjerrja e të shtatë personave nga rrjedha e ujit. Fatmirësisht, asnjë prej tyre nuk ka pësuar lëndime dhe të gjithë janë në gjendje të mirë shëndetësore.

Autoritetet apelojnë për kujdes të shtuar gjatë qëndrimit pranë lumenjve dhe zonave ujore, veçanërisht në raste kur ka ndryshime të papritura të nivelit të ujit. Policia u bën thirrje qytetarëve që në çdo situatë emergjente të kontaktojnë menjëherë numrin pa pagesë 112.