U kërcënua në Facebook nga shkodrani, Policia dhe Garda marrin në mbrojtje Klement Zgurin dhe familjen e tij

Kërcënohet kreu i KQZ-së Klement Zguri dhe familja e tij. Zguri dhe familja e tij janë marrë në mbrojtje nga forcat e policisë dhe Garda.

Personi me iniciale E.P., nga Shkodra e ka kërcënuar se do ta vriste atë dhe familjen e tij.

Komisioni Qendror i Zgjedhjeve është rrethuar sot nga forca të shumta të Policë dhe të Gardës së Republikës, pas kërcënimit me jetë që ka marrë sot kryetari i KQZ-së, Klement Zguri dhe familja e tij.

Efektiv policie janë vendosur në portën kryesore të KQZ-së, ndërkohë që dy gardistë qëndrojnë tek shkallët e Institucionit Qendror të Zgjedhjeve.

Ndërsa tre efektiv të Gardës së janë pozicionuar para derës së zyrës së kreut të KQZ-së.

Gazetari i “Panorama” bën të ditur se gardistët që e kanë marrë në mbrojtje qëndrojnë në katin e dytë të KQZ-së, ndërkohë që në foto, shihet Klement Zguri teksa hynë në mbledhjen e radhës, ku pas tij është truproja personal. Ndërkohë që edhe gjatë mbledhjes së KQZ-së kanë qëndruar brenda sallës dy efektiv të Gardës.

Burime të Panorama bënë të ditur se Klement Zguri ka marrë kërcënime shumë serioze dhe se familja e tij është marrë në mbrojtje.

Gjithçka ka nisur dje pas mbledhjes së KQZ-së, ku Zguri kërkoi hapjen e kutive të 30 qershorit, por kërkesa e tij u rrëzua nga 4 anëtarët e zgjedhur nga Partia Socialiste në KQZ. Pas kësaj mbledhje Klement Zguri mësohet se ka marrë kërcënime me jetë.