Ambasada e SHBA

Ambasada e SHBA ka reaguar mbi lajmin që qarkulloi sot në vendin tonë, se urdhri ekzekutiv i presidentit Donald Trump për pezullimin e fondeve ka prekur edhe Shqipërinë. Ambasada i ka dërguar një shkresë Ministrisë së Jashtme, ku bën me dije se janë pezulluar fondet për rreth 32 organe, duke përfshirë SPAK, KLGJ, KLP, ministritë, bashkitë, etj.

Ambasada e SHBA në Tiranë përmes një reagimi thotë se vendimi është marrë në përputhje me Urdhrin Ekzekutiv të Presidentit. Interesit të mediave, ambasada u është përgjigjur duke vënë në dispozicion deklaratën për shtyp të Zëdhënëses së Departamentit të Shtetit, Tammy Bruce, të datës 26 janar. Ajo aty e bën të qartë se nuk do të ketë më para “qyl”. Këtë qëndim mban edhe ambasada.

“Faleminderit për pyetjen.

Ju referojmë tek deklarata për shtyp e Zëdhënëses së Departamentit te Shtetit Tammy Bruce në dt 26.  Më poshtë gjeni variantin shqip të deklaratës:

“Në përputhje me Urdhrin Ekzekutiv të Presidentit Trump për Rivlerësimin dhe Riorganizimin e Ndihmës Ndërkombëtare të Shteteve të Bashkuara, Sekretari Rubio ka pezulluar të gjithë ndihmën ndërkombëtare të SHBA të financuar nga ose përmes Departamentit të Shtetit dhe Agjencisë së Shteteve të Bashkuara për Zhvillim Ndërkombëtar (USAID) për shqyrtim. Ai po fillon një rishikim të të gjitha programeve të ndihmës ndërkombëtare për të siguruar që ato të jenë efikase dhe në përputhje me politikën e jashtme të SHBA nën agjendën Amerika e Para.

Presidenti Trump deklaroi qartë se Shtetet e Bashkuara nuk do të japin më verbërisht para që nuk sjellin asgjë për popullin amerikan. Rishikimi dhe riorganizimi i ndihmës ndërkombëtare në emër të taksapaguesve që punojnë fort nuk është thjesht gjëja e duhur për t’u bërë, por është një detyrim moral. Sekretari është krenar që mbron investimet e Amerikës me një rishikim të qëllimshëm dhe të kujdesshëm se si ne shpenzojmë dollarët e ndihmës ndërkombëtare jashtë vendit.

Mandati i popullit amerikan ishte i qartë – ne duhet të ripërqendrohemi në interesat kombëtare amerikane. Departamenti dhe USAID-i e marrin shumë seriozisht rolin e tyre si kujdestarë të dollarëve të taksapaguesve. Zbatimi i këtij Urdhri Ekzekutiv dhe drejtimi i Sekretarit e çojnë më tej këtë mision. Siç ka thënë Sekretari i Shtetit Marco Rubio, “Çdo dollar që shpenzojmë, çdo program që financojmë dhe çdo politikë që ndjekim duhet të justifikohet me përgjigjen për tri pyetje të thjeshta: A e bën Amerikën më të sigurt? A e bën Amerikën më të fortë? A e bën Amerikën më të begatë?”.

Ju faleminderit”, shprehet ambasada në një reagim për mediat shqiptare.

Sekretari i Shtetit, Marco Rubio, u dërgoi një mesazh ambasadave amerikane në mbarë botën duke sqaruar zbatimin e urdhrit dhe menjëherë ambasada amerikane në Tiranë u ka dërguar një shkresë institucioneve shqiptare, duke informuar pezullimin e fondeve.

Zbulohet lista e  institucioneve shqiptare që preken nga urdhri ekzekutiv i Donald Trump, për të pezulluar fondet ndihmëse në shtetet aleate të SHBA.

Sapo mori detyrën, presidenti Donald Trump nënshkroi një urdhër ekzekutiv që pezullon përkohësisht të gjitha programet e ndihmës së huaj nga ana e Shteteve të Bashkuara për 90 ditë, në mënyrë që të rishikohen dhe të përcaktohet nëse ato janë në përputhje me objektivat e tij politike.

Në urdhër, në mesin e shumë urdhrave ekzekutivë që zoti Trump firmosi në ditën e tij të parë të kthimit në detyrë, thuhej se “ndihma e huaj dhe burokracia nuk janë në linjë me interesat amerikane dhe në shumë raste në mospërputhje me vlerat amerikane” .

Rrjedhimisht, zoti Trump deklaroi se “nuk do të lëvrohet më asnjë ndihmë e huaj nëse nuk përputhet plotësisht me politikën e jashtme të Presidentit të Shteteve të Bashkuara”.

Sekretari i Shtetit, Marco Rubio, u dërgoi një mesazh ambasadave amerikane në mbarë botën duke sqaruar zbatimin e urdhrit dhe menjëherë ambasada amerikane në Tiranë u ka dërguar një shkresë institucioneve shqiptare, duke informuar pezullimin e fondeve.

Shkresa përmban dhe një listë me institucionet që preken nga kjo tërheqje. Ajo i është dërguar fillimisht Ministrisë së Jashtme ku ndër të tjera thuhet: “Partnerët e programeve dhe zbatuesit e programeve të ndihmës së financuar nga SHBA në Shqipëri po njoftohen për këtë veprim. Ky dokument shërben si njoftim zyrtar për Qeverinë e Republikës së Shqipërisë. Ambasada e Shteteve të Bashkuara të Amerikës kërkon me mirësjellje që ky njoftim të ndahet me të gjitha ministritë, institucionet dhe entet e tjera qeveritare përkatëse që bashkëpunojnë përmes programeve ekzistuese të ndihmës së huaj të SHBA-së“.

Lista e institucioneve që preken

1.       Ministria e Financave, duke përfshirë Agjencinë e Inteligjencës Financiare

2.       Ministria e Brendshme, duke përfshirë Policinë e Shtetit Shqiptar, Agjencinë e Mbikëqyrjes Policore dhe Qendrën e Koordinimit për Luftën kundër Ekstremizmit të Dhunshëm

3.       Ministria e Bujqësisë dhe Zhvillimit Rural

4.       Ministria e Drejtësisë, duke përfshirë Drejtorinë e Përgjithshme të Burgjeve

5.       Ministria e Mbrojtjes

6.       Ministria për Evropën dhe Punët e Jashtme

7.       Ministria e Arsimit dhe Sportit

8.       Ministria e Turizmit dhe Mjedisit

9.   Ministria e Shëndetësisë dhe Mirëqenies Sociale

10.   Ministria e Shtetit për Rininë dhe Fëmijët

11.   Ministria e Shtetit për Qeverisjen Vendore

12.   Ministria e Ekonomisë, Kulturës dhe Inovacionit

13.   Ministria e Infrastrukturës dhe Energjisë, duke përfshirë Koorporatën Elektro Energjetike Shqiptare (KESH), Operatorin e Sistemit të Transmetimit (OST), Operatorin e Shpërndarjes së Energjisë Elektrike (OSHEE) dhe Bursën Shqiptare të Energjisë Elektrike (ALPEX)

14.   Ministria e Shtetit për Administratën Publike dhe Antikorrupsionin

15.   Ministria e Shtetit për Marrëdhëniet me Parlamentin

16.   Parlamenti, duke përfshirë komisionet e tij

17.   Këshilli i Lartë Gjyqësor

18.   Këshilli i Lartë i Prokurorisë

19.   Gjykata Kushtetuese

20.  Gjykata e Lartë

21.   Të gjitha gjykatat, duke përfshirë Gjykatat e Apelit, Gjykatat Administrative të Apelit dhe Gjykatat e Shkallës së Parë

22.   Struktura e Posaçme Kundër Korrupsionit dhe Krimit të Organizuar, duke përfshirë Prokurorinë e Posaçme dhe Byronë Kombëtare të Hetimit

23.   Gjykata e Posaçme e Shkallës së Parë për Korrupsionin dhe Krimin e Organizuar

24.   Gjykata e Posaçme të Apelit për Korrupsionin dhe Krimin e Organizuar

25.   Zyra e Prokurorit të Përgjithshëm

26.   Inspektori i Lartë i Drejtësisë

27.   Komisioni i Pavarur i Kualifikimit, Operacioni Ndërkombëtar i Monitorimit dhe Kolegjit të Posaçëm të Apelimit

28.   Autoriteti Kombëtar për Sigurinë Kibernetike (AKSK)

29.   Agjencia Kombëtare e Shoqërisë së Informacionit (AKSHI)

30.   Ministria e Shtetit dhe Zyra e Kryenegociatorit

31.   Agjencia Shtetërore për Programimin Strategjik dhe Koordinimin e Ndihmës (SASPAC)

32.   Të gjitha njësitë e qeverisjes vendore.