Vdekja e turistit spanjoll në Divjakë vë në lëvizje Prokurorinë

Prokuroria pranë Gjykatës së Shkallës së Parë Lushnjë ka regjistruar një procedimi penal për veprën penale “Shkaktimi i vetëvrasjes”, pa autor, lidhur me humbjen e jetës së turistit spanjoll, Francisco Javier Carraso Cervilla.

Ky procedim penal ka filluar mbi bazën e materialeve të dërguara nga Komisariati i Policisë Divjakë.

Regjistrimi i këtij procedimi penal është bërë me qëllim kryerjen e një hetimi të plotë dhe të gjithanshëm për dinamikën dhe shkaqet e ngjarjes.

Ky procedim është në fazën fillestare të tij dhe nisur nga natyra e çështjes janë kryer veprimet e plota hetimore që konsistojnë në këqyrjen e vendit të ngjarjes, sekuestrimin e provave materiale dhe këqyrjen e tyre, janë marrë vendimet e nevojshme të ekspertimit, janë pyetur persona që kanë dijeni për ngjarjen.

Të gjitha të dhënat e përftuara deri në këtë fazë po analizohen dhe kryqëzohen me njëra-tjetrën, me qëllim përcaktimin e shkakut të ardhjes së pasojës.

Kujtojmë se turisti spanjoll u vetëplagos në 21 mars të këtij viti, gjatë kohës që ishte duke bërë dush dhe si pasojë humbi jetën.