Vettingu, shkarkohet gjyqtari i Kushtetueses, Fatos Lulo dhe bllokohet përfundimisht Gjykata Kushtetuese

Shkarkohet nga detyra anëtari i Gjykatës Kushtetuese, Fatos Lulo.

Vendimi është shpallur nga kryetarja e Komisioni i Pavarur i Kualifikimit Genta Tafa Bungo, pak ditë pas seancës së vettingut, ku u pranuan provat e gjyqtarit.
Në seancën e sotme, KPK-ja tha se kishte vendosur shkarkimin nga detyra të Fatos Lulo anëtar i Gjykatës Kushtetuese.

‘Vendimi i njoftohet subjektit, Komisionerit publik brenda 30 ditëve të kësaj seance dëgjimore dhe publikohet në faqen zyrtare të KPK.

Ky vendim apelohet pranë Kolegjit të Apelimit nga subjekti 15 ditë nga data e publikimit të njoftimit.

Ankimi publikohet pranë KPK’, tha Bungo në fjalën e saj.

Shkarkimi i Lulos bllokon përfundimisht Kushtetuesen, çfarë pritet të ndodhë
Pas vendimit të sotëm të Komisioni të Pavarur të Kualifikimit për shkarkimin nga detyra të Fatos Lulos, Gjykata Kushtetuese e Republikës së Shqipërisë përfundimisht mund të cilësohet e bllokuar dhe madje inekzistente.

Pavarësisht se gjyqtari Lulo sipas avokatit Visha, do të ankimojë vendimin në Kolegjin e Apelimit, ai nuk mund të ushtrojë më detyrën.
Shkarkimi i Lulos pas Vetingut, reagon avokati: Vendim i padrejtë, do ta apelojmë

Neni 62 i ligjit të Vetingut parashikon që subjekti i rivlerësimit, i cili ka ushtruar të drejtën e ankimit ndaj vendimit të Komisionit për masën disiplinore për shkarkimin nga detyra, pezullohet nga detyra e tij në pritje të vendimit të Kolegjit të Apelimeve.

Gjatë periudhës së pezullimit atij i njihet e drejta e pagës në masën 75 për qind të saj.

Por edhe para këtij vendimi ka pasur një debat të madh për çështjen e Gjykatës Kushtetuese. Tani pas shkarkimit të Lulos, ajo përfundimisht, nuk merr dot më vendime.

Aktualisht Presidenti i Republikës, Ilir Meta, ka vendosur të hapë procedurën e zgjedhjes së dy anëtarëve të Gjykatës Kushtetuese, por edhe ky proces duket se do të dojë një kohë të gjatë, pasi me futjen në fuqi të ligjeve të reformës në drejtësi, anëtarët e rinj të gjykatës duhet të kenë kaluar më parë Vetingun.

Edhe pasi të kryhet kjo procedurë emrat e kandidatëve do të kalojnë nga KED, Këshilli i Emërimeve në Drejtësi dhe më pas, Kuvendi zgjedh gjyqtarin e Gjykatës Kushtetuese me jo më pak se tri të pestat e të gjithë anëtarëve të tij.

Nëse Kuvendi nuk zgjedh gjyqtarin brenda 30 ditëve nga paraqitja e listës nga Këshilli i Emërimeve në Drejtësi, kandidati i renditur i pari në listë shpallet i emëruar.

Pra praktikisht vendi ynë mund të konsiderohet pa Gjykatë Kushtetuese, sepse edhe ata anëtarë që kanë ngelur pas shkarkimit të Lulos, nuk mund të marrin dot më asnjë vendim.