Video/ Dalin PROVAT, banorët me telefon brenda Big Brother VIP

Ish-banori i Big Brother VIP Kosova 4, Labinot Rexha, ka ndezur debat në rrjete sociale pas publikimit të një videoje ku pretendon se evidenton parregullsi brenda shtëpisë së famshme.

Rexha, i cili më herët është shprehur se largimi i tij nga gara ishte i padrejtë, duke pretenduar se kishte marrë më shumë vota pro sesa kundër për të vazhduar qëndrimin, ka ndarë një material që – sipas tij – ngre dyshime mbi funksionimin e produksionit.

Në videon e publikuar, e cila sipas Rexhës është filmuar pa dijeninë e stafit, shihet ish-banorja Bia Khalifa duke mbajtur në duar një telefon që pretendohet se i përkiste ish-banores Alba Pollozhani. Rexha sugjeron se prania e një telefoni brenda shtëpisë përbën shkelje të rregullave themelore të formatit, i cili parashikon izolim total nga informacionet e jashtme.

Në përshkrimin që shoqëron videon, ai pretendon se momenti i filmuar përfshin edhe një kërkesë që situata të mos bëhej publike, duke e konsideruar këtë si shkelje të licencës ndërkombëtare të formatit “Big Brother”, me origjinë nga Holanda.

Deri më tani, nuk ka pasur një reagim zyrtar nga produksioni apo nga personat e përmendur në video. Ngjarja ka ndarë publikun mes atyre që kërkojnë transparencë dhe atyre që presin një sqarim zyrtar para se të nxjerrin përfundime.

Debati rreth funksionimit të reality show-t pritet të vijojë, ndërsa mbetet për t’u parë nëse produksioni do të adresojë publikisht pretendimet e ngritura.