Vizita në Shqipëri, Ivanka Trump “zgjidh” rebusin e Magical Albania

Pas tre ditësh të kaluara në Shqipëri, mes gostive zyrtare, protokolleve të tepruara dhe një entuziazmi lokal që shpesh kalon në bezdi, Ivanka Trump ka ndarë më në fund përshtypjet e saj nga ajo që promovohet si “Magical Albania”.

Në albumin e publikuar prej saj, Shqipëria përfaqësohet nga tre imazhe simbolike: Ishulli i Sazanit, i përshkruar si “magjik” në mes të një deti të mrekullueshëm; Manastiri i Zvërnecit, i paraqitur si një hapësirë paqeje; dhe — në mënyrë jo pak ironike — një lopë indiferente që kullot në bregdet, e vetmja qenie e gjallë e përfshirë në galerinë fotografike.

Një përzgjedhje që, përtej estetikës, ngjan më shumë me një mesazh të heshtur: shumë dekor, pak jetë reale. Asnjë gjurmë nga qytetet, njerëzit, apo realiteti social i vendit, por vetëm peizazhe dhe një kafshë që duket krejtësisht e painteresuar për narrativën “magjike”.

“Thank you, Lady”, do të thoshin disa me ironi. Sepse ndonjëherë, një lopë në breg flet më shumë se dhjetë fjalime promocionale.