Vlora turistike/ Qytetarët “i çjerrin maskën” propagandës së Ramës

Një denoncim i mbërritur në redaksinë e publik.al nxjerr në pah kontrastin e fortë mes imazhit të promovuar nga kryeministri Edi Rama dhe realitetit në terren, në një nga qytetet kryesore turistike të vendit, Vlorë. 

“Propaganda dje në darkë, realiteti sot në mëngjes. Kjo është Vlora turistike”, shprehet qytetari, duke shoqëruar mesazhin me foto dhe video që tregojnë gjendjen e vërtetë të një hapësire publike të sapo promovuar.

Pamjet ilustrojnë një zonë sportive moderne buzë detit, e cila në rrjetet sociale shfaqet si një investim model, i pastër dhe funksional.

Por vetëm pak orë më vonë, e njëjta hapësirë paraqitet e ndotur, me mbetje ndërtimi, qese dhe materiale të shpërndara pa asnjë standard mirëmbajtjeje.

Ky kontrast i fortë ka sjellë reagimin e qytetarëve, të cilët e konsiderojnë këtë një shembull tipik të diferencës mes propagandës dhe realitetit.

Sipas tyre, nuk mjafton promovimi i investimeve përmes imazheve të kuruara, nëse mungon mirëmbajtja bazë dhe përgjegjësia institucionale.

Në kulmin e sezonit turistik, situata të tilla jo vetëm që dëmtojnë imazhin e qytetit, por ndikojnë drejtpërdrejt edhe në përvojën e pushuesve dhe standardet që Shqipëria synon të ofrojë për vizitorët.

Rasti i fundit në Vlorë rikthen në vëmendje një problem të përsëritur: përplasjen mes fasadës së promovuar dhe realitetit që qytetarët përjetojnë çdo ditë.