Vodhi kasafortën me 600 mijë lekë dhe 6 telefona, arrestohet 46-vjeçari

Një 46-vjeçar është arrestuar në Kavajë, pasi dyshohet se, në bashkëpunim me një person tjetër, ka vjedhur kasafortën e një dyqani rrobash, ku mbaheshin rreth 600 mijë lekë. Nga ambientet e biznesit dyshohet se janë marrë edhe gjashtë telefona celularë.

Ngjarja u denoncua më 8 tetor 2026 nga menaxherja e dyqanit, që ndodhet në lagjen nr. 3 të Kavajës. Pas veprimeve hetimore për identifikimin e personave të përfshirë, policia arrestoi shtetasin me inicialet M. L., 46 vjeç, banues në këtë qytet.

Gjatë kontrollit të banesës së tij, efektivët gjetën dhe sekuestruan kasafortën e vjedhur, brenda së cilës ndodhej ende një pjesë e shumës së parave.

Ndërkohë, policia ka identifikuar edhe bashkëpunëtorin e dyshuar, shtetasin A. S., 30 vjeç, gjithashtu banues në Kavajë. Ai është shpallur në kërkim, ndërsa vijojnë përpjekjet për lokalizimin dhe kapjen e tij.

Materialet procedurale për rastin i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprën penale “Vjedhja”. Hetimet vijojnë për dokumentimin e plotë të ngjarjes dhe përcaktimin e rolit të secilit prej personave të dyshuar.