Vrasja e 49-vjeçarit në Tropojë për një copë toke

Konflikti për një copë tokë është bërë shkak për sherrin midis dy familjeve në fshatin Çerem të Tropojës, sherri i cili përfundoi me vrasje pasditen e së shtunës.

Shtetasi Isat Goci u qëllua me armë zjarri nga autori i dyshuar Altin Ismajlisufi, i cili përfundoi në prangat e Policisë rreth dy orë pas krimit.

Në dëshminë e tij paraprake para hetuesve pas arrestimit, Ismajlisufi me profesion zjarrfikës ka deklaruar se prej muajsh familja e tij dhe ajo Goci kishin konflikte për një copë toke që ndodhet pranë banesave të tyre.

Ai ka deklaruar se ditën e ngjarjes viktima kishte dhunuar djalin e tij, ndërsa nënën e kishte shtyrë dhe rrëzuar në oborr.

“Prej muajsh kishim debate të vazhdueshme. Isati më dhunonte familjen sapo i shihte në rrugë. Shkak i sherreve tona është një sipërfaqe toke që ndodhet pranë shtëpive tona. Edhe pak orë para se të takohesha me Isatin djali më tha se ai e kishte dhunuar. Ndërsa nënën time e kishte shtyrë në oborr”, mësohet të ketë deklaruar Altin Ismajlisufi.

NGJARJA

Konflikti midis dy fshatarëve ka nisur pasditen e së shtunës, ku paraprakisht dyshohet se viktima, Isat Goci, 49 vjeç, ka qëlluar djalin e autorit të dyshuar të ngjarjes. Më pas Goci ka shkuar pranë banesës së autorit duke u përballur fillimisht me nënën e tij, të cilën e ka shtyrë dhunshëm duke e rrëzuar përtokë.

Më pas 49-vjeçari ka tentuar të hyjë brenda banesës me pretendimin për t’u sqaruar. Në atë moment ka dalë Ismajlisufi, i cili pasi ka dalë në oborr dhe ka parë nënën të shtrirë në tokë, i ka kërkuar viktimës të largohej.

Në debat e sipër, mësohet se i arrestuari me profesion zjarrfikës në Tropojë e ka qëlluar me armë zjarri tip pistoletë në pjesën e këmbës. Plaga ka qenë fatale për 49- vjeçarin. Pavarësisht se u transportua me urgjencë në drejtim të Spitalit të Bajram Currit, ai nuk ka arritur të mbijetojë për shkak të humbjes së madhe të gjakut.

“Rreth orës 15:30, në fshatin Çerem, në rrethana ende të paqarta, është vrarë me armë zjarri shtetasi I. G., 49 vjeç, banues në Çerem. Menjëherë në vendngjarje janë nisur shërbimet e Policisë, të cilat falë veprimeve të shpejta, bënë të mundur identifikimin dhe shpalljen në kërkim të autorit të dyshuar, shtetasit A. I., banues në Çerem.

Vijon krehja e zonës me qëllim kapjen e autorit të dyshuar. Grupi hetimor, nën drejtimin e Prokurorisë së Rrethit Gjyqësor Tropojë, vijon punën për zbardhjen dhe dokumentimin e plotë të rrethanave të ngjarjes”, tha Policia. Policia lokale tha se arrestoi në kohë rekord autorin e dyshuar, shtetasin Ismajlisufi.

Arrestimi është kryer rreth dy orë pas ngjarjes së rëndë, ku zjarrfikësi ka tentuar të arratiset në drejtim të Kosovës. Gjatë kontrollit të banesës në fshatin e thellë malor me vetëm pak familje, Policia ka sekuestruar edhe një armë zjarri të llojit pistoletë, me të cilën dyshohet të jetë kryer vrasja e 49-vjeçarit.

Viktimat Isat Goci shkoi pranë banesës së familjes Ismajlisufi pasditen e së shtunës për t’u sqaruar sërish, ndërsa mësohet se në oborr ai ka shtyrë duke rrëzuar përtokë nënën e autorit të dyshuar të ngjarjes. Pas këtij akti, zjarrfikësi Ismajlisufi ka qëlluar me armë në pjesën e këmbës. Për shkak të humbjes së madhe të gjakut pasi fshati ndodhet 25 km larg qytetit të Bajram Currit, Goci nuk ka arritur të mbijetojë.