Vrasja e Elton Javorit, ja 3 pistat ku po hetohet

Elton Javori, 41 vjeç, u ekzekutua pak para mesditës së të enjtes, në lagjen 16 Prilli në Fier, vetëm pak metra larg banesës së tij.

Nga një video e publikuar, e cila është marrë nga kamerat e sigurisë, duket se një automjet “E Class” fuoristrada, ecën paralelisht me automjetin Porsche ku udhëtonte viktima, i cili ul xhamin, dhe më pas qëllohet me pistoletë. Një nga plumbat e ka kapur në pjesën e qafës, duke i shkaktuar edhe plagën që më pas i morri jetën.

Policia identifikoi brenda pak minutash autorin e dyshuar të krimit, Agim Gashi, i cili njihej edhe me emrin Agli, 35 vjeç.

Grupi hetimor ka sekuestruar pamjet filmike, përmes të cilave ka arritur të ngrejë dyshime mbi autorin, që u largua menjëherë nga vendi i ngjarjes, ndërsa policia e ka shpallur në hetim.

Viktima është nipi i biznesmenit Demir Backa, i ekzekutuar me armë automatike në 2021, por edhe i Medi Backës, i vrarë në 1997, në atë që njihet si masakra e Levanit.

Demir Backa njihej në Fier si një nga biznesmenët e fuqishëm, i cili u ekzekutua teksa ndodhej në automjetin e tij.

Grupi hetimor po heton në 3 pista lidhur me vrasjen e sotme të 41-vjeçarit. Dyshimet e para janë ngritur mbi një konflikt të 2 javëve më parë mes autorit të dyshuar Agim (Agli) Gashi dhe viktimës Elton Javori.

Një tjetër pistë është një krushqi e prishur mes dy fiseve, që janë me origjinë të largët nga Kosova, por prej dekadash jetojnë në Fier.

Ndërkohë që pista e tretë është ajo e prishjes së pazareve në veprimtari të paligjshme. Nga raportimet mësohet se viktima ka qenë në Gjermani, është kthyer në Shqipëri gjatë 3 muajve të fundit, çka ka bërë që grupi hetimor të mbledhë informacione mbi periudhën që 41-vjeçari ka jetuar në këtë vend.

Policia ka arritur të marrë dëshmi nga persona të ndryshëm, përfshirë këtu edhe të afërm të viktimës, i cili sipas fqinjëve të tij, ishte një person i qetë dhe jo problematik.