Vrasja e “Gëçes”, goditet grupi i “paprekshëm” Hajrulla

Prokuroria e Posaçme dhe forcat speciale kanë zhvilluar një operacion në qytetin e Vlorës, ku që prej orëve të para të mëngjesit janë kryer kontrolle në zonën e njohur si “7 Pallatet Oslo”.

Aksioni vjen pas hetimeve të kryera nga SPAK, të cilat kanë zbardhur komunikime të përgjuara në platformën e koduar Sky ECC. Nga këto zbërthime, sipas burimeve hetimore, është goditur grupi kriminal që dyshohet se drejtohej nga Inez Hajrulla.

Në kuadër të operacionit janë lëshuar urdhër-arreste për Inez Hajrullën dhe Ervis Hajrullën, ndërsa hetimet kanë çuar edhe në zbardhjen e disa ngjarjeve kriminale të ndodhura në qytetin bregdetar.

Ekzekutimi i Gentian Qarrit

Një nga ngjarjet që dyshohet se lidhet me këtë grup është edhe vrasja e Gentian Qarrit, e ndodhur mbrëmjen e 6 shkurtit 2021 në Vlorë.

Sipas hetimeve, autorët kanë qëndruar për rreth 10 minuta në pritje në zonë, derisa Qarri të dilte nga ambientet e një gomisterie pranë vendit të ngjarjes dhe të drejtohej drejt një lokali.

Pamjet filmike të sekuestruara nga prokuroria tregojnë se autorët ndodheshin në një automjet tip “Toyota Yaris”, i cili ka lëvizur pak çaste përpara se të hapej zjarri.

Në një moment pranë vendit ka kaluar edhe një automjet policie, çka i detyroi autorët të largoheshin përkohësisht dhe të riktheheshin pas pak minutash për të vijuar me planin e tyre.

Sipas hetimeve, ndaj Qarrit është qëlluar rreth 20 herë me armë zjarri, ndërsa gjashtë plumba e kanë goditur në trup. Nga pamjet e siguruara nga policia dyshohet se sulmi është kryer me automatik nga brenda makinës në lëvizje.

Gentian Qarri, i njohur në Vlorë edhe me nofkën “Gëçe”, ishte kthyer në Shqipëri rreth tre vite para vrasjes, pasi kishte vuajtur një dënim prej 11 vitesh burg në Itali për trafik droge.