Vrasja makabër e 8-vjeçarit nga fqinji në Fier, flet mes dhimbjes dhe lotëve daja: Nga shteti kërkojmë varje, asgjë tjetër!

Vrasja e fëmijës 8-vjeçar në fshatin Grecalli të Fierit nga fqinji i tij 38-vjeçar, Klodian Çalamani, ka shkaktuar një tronditje jo vetëm tek anëtarët e familjes së vogëlushit, apo komuniteti aty, por në mbarë opinionin publik.

Në një prononcim për median daja i viktimës, i cili ndodhet pranë familjes së 8-vjeçarit në këto momente të vështira, kërkon varjen në mes të Fierit të autorit që kreu krimin e rëndë.

“Nga shteti kërkojmë vetëm varje. S’ka ligje. Apeli im më i madh është ma nxirr aty në mes të Fierit ma var, asgjë tjetër. Ky është apeli i fundit. Shteti do ta marrë, do ta nxjerrë prapë. Unë nuk di gjë për motivin”, thotë Nikolin Braja me lot në sy e mjekrën që i dridhet.

Vogëlushi do të përcillet sot në banesën e fundit, teksa pranë shtëpisë së tij edhe sot janë vendosur forca të shumta policie.