Vrasje apo aksident?! 22-vjeçari përplas me makinë avokatin dhe zhduket

Një aksident tragjik ndodhi më 21 gusht, në rrugën dytësore “Plepa-Kavajë”, ku humbi jetën avokati Leonard Dingo, 63 vjeç. Ngjarja u shënua rreth orës 01:00, kur Dingo u përplas nga një automjet dhe ndërroi jetë në spital.

Pas dy ditësh hetimesh, policia identifikoi dhe shpalli në kërkim autorin e dyshuar, Erjon Kaçani, 22 vjeç nga Tirana. Kaçani braktisi automjetin e tij në fshatin Kodër Arapaj dhe u largua nga vendngjarja.

Automjeti i tij u gjet dhe u sekuestrua nga policia për hetime të mëtejshme. Ndërkohë, kolegët e viktimës ngritën dyshime se vdekja e Dingo-s mund të jetë rezultat i një krimi të lidhur me detyrën e tij si avokat, dhe jo një aksident i zakonshëm.

Ata kërkojnë një hetim të plotë për zbardhjen e rrethanave të ngjarjes. Incidenti ka shkaktuar tronditje në komunitetin e avokatëve, të cilët dyshojnë se aksidenti mund të ketë qenë i qëllimshëm. Policia vazhdon hetimet për të zbuluar të vërtetën pas kësaj ngjarjeje tragjike.