Zbulohet e shkuara kriminale e Andrew Bodes

Andrew Bode është personi i shpallur në kërkim, i akuzuar si bashkëautori i Albano Velos në ekzekutimin e 49-vjeçarit, Edmond Papa.

44-vjeçari Bode nga Berati, i cili prej vitesh jetonte në Tiranë, është një emër i njohur për uniformat blu.

Kjo pasi ai rezulton të ketë probleme me drejtësinë greke. 44-vjeçari ishte dënuar dhe shpallur në kërkim nga autoritetet greke për trafikim të lëndëve narkotike.

Andrew Bode më parë ka mbajtur emrin Ervin, por e kishte ndryshuar për shkak të problemeve në shtetin fqinj.

Tashmë ndaj tij bie edhe akuza e bashkëautorësisë së atentatit të 16 dhjetorit. Policia ka filluar kontrollet në disa qytete, pasi dyshohet se Bode fshihet në Shqipëri.

Sipas mediave, në datën 29 dhjetor ai kishte bërë një aplikim për të nxjerrë pasaportë me procedurë të përshpejtuar dhe në datën 30 dhjetor e kishte tërhequr. Aktualisht ai nuk është vënë ende në pranga.