Zbulohet ‘foleja’ e prostitucionit në Fier, 2 të huaja në pranga

Një rast prostitucioni është goditur nga Policia e Fierit pas një hetimi të zhvilluar me metoda speciale, duke çuar në arrestimin e dy shtetaseve të huaja që dyshohet se ushtronin aktivitet të paligjshëm në një apartament të marrë me qira.

Në pranga kanë rënë një 30-vjeçare nga Kazakistani dhe një 31-vjeçare nga Turqia, të cilat sipas hetimeve kishin përshtatur një banesë në qytetin e Fierit për ushtrimin e prostitucionit.

Operacioni u zhvillua nga specialistët e Seksionit për Hetimin e Trafiqeve në Drejtorinë Vendore të Policisë Fier, në bashkëpunim me Forcën e Posaçme Operacionale. Pas verifikimeve dhe mbledhjes së provave, u bë arrestimi i dy shtetaseve të huaja që dyshohet se përfitonin të ardhura nga kjo veprimtari.

Gjatë kontrollit në ambientet e banesës, policia sekuestroi si prova materiale 2800 euro dhe 29 mijë lekë, të cilat dyshohet se janë përfituar nga aktiviteti i paligjshëm, si dhe pesë telefona celularë që pritet të shërbejnë për zbardhjen e plotë të çështjes.

Autoritetet bëjnë me dije se hetimet vijojnë për të identifikuar persona të tjerë të përfshirë dhe për të dokumentuar plotësisht këtë aktivitet kriminal.