Zbulohet FOTOJA e ‘BANDËS 2B’ që ‘kollarisën’ tenderat e qeverisë

Gazment Bardhi ka bërë publike një fotografi ku shfaqet një grup zyrtarësh të afërt me Belinda Ballukun, të cilët ai i etiketon si “Banda 2B”. Fotoja, sipas tij, paraqet personat që përbënin rrethin e ngushtë të ish-zv.kryeministres dhe ministres së Infrastrukturës, e cila aktualisht është pezulluar nga detyra pas ngritjes së akuzave nga SPAK dhe marrjes së statusit të të pandehurës nga GJKKO.

Në pamje, selfien e realizon Evis Berberi, ish-drejtues i ARRSH-së, i cili aktualisht është në paraburgim për akuza që lidhen me korrupsion dhe shpërdorim detyre.

Në krahun e djathtë të fotos ndodhen disa zyrtare të ministrisë:

• Viola Haxhiademi, sekretare e përgjithshme dhe kryesuese e komisionit të vlerësimit të ofertave për tenderin e tunelit të Llogarasë; konsiderohet personi që ka pasur rol kyç në administrimin e dokumenteve dhe fondeve.

• Vikrita Çuto, drejtore e burimeve njerëzore në ministri.

• Sindi Dushku, shefe e kabinetit, e njohur edhe si kushërirë e deputetes Olta Xhaçka.

Në krye të tavolinës shfaqet Ceno Klosi, ndërsa menjëherë pas tij është Arber Avrami, ish-drejtor i Albgaz-it.

Në vijim të rreshtimit shihet edhe vetë Belinda Balluku, Florian Serjani, këshilltar për çështjet e medias, si dhe Evis Mamaj, drejtoreshë e buxhetit në Ministrinë e Infrastrukturës dhe Energjisë, e cila dyshohet se ka pasur rol të rëndësishëm në proceset e tenderimit. Sipas burimeve, telefonit të saj i është vendosur sekuestro.

Sipas Bardhit, ky grup mblidhej rregullisht në një banesë të identifikuar si “Apartamenti 6, Shkalla H”, në kompleksin Nobis, ku, siç pretendon ai, diskutoheshin dhe ndaheshin tenderat e ministrisë me qëllime klienteliste.

Ai i përshkruan këta zyrtarë si një strukturë të organizuar, të cilët – sipas pretendimeve të tij – menaxhonin tendera me vlera shumë të larta për të favorizuar klientë të caktuar dhe për të siguruar përfitime të paligjshme. Bardhi shton gjithashtu se një pjesë e këtyre parave përdoreshin për fushata elektorale ose për shpenzime luksi.