Zgjedhjet e 9 nëntorit, Celibashi: Rezultati, brenda 24 orëve!

Kryekomisioneri i KQZ-së, Ilirjan Celibashi, ka folur lidhur me zgjedhjet e pjesshme që do të zhvillohen më 9 nëntor në bashkitë e Matit, Vlorës, Tepelenës, Beratit dhe Cërrikut.

Celibashi bëri me dije se për pak ditë do të publikohet lista përfundimtare e votuesve, që përfshin mbi 300 mijë qytetarë. Ai shtoi se rezultatet mund të jenë të njohura brenda 24 orëve, deri më 10 nëntor.

Një veçori e këtyre zgjedhjeve është eksperimenti me përdorimin e inteligjencës artificiale për numërimin e fletëve të votimit, i cili, sipas Celibashit, nuk do të ndikojë në rezultatin përfundimtar.

“Listën finale të zgjedhësve nuk e kemi akoma për pak ditë del lista dhe do kemi numrin përfundimtar të zgjedhësve. Janë mbi 300 mijë votues. Gjykuar nga lloji i zgjedhjeve dhe angazhimi që këto zgjedhje kërkojnë, besoj se do e kemi rezultatin e zgjedhjeve për kryetar bashkie, brenda datës 10 nëntor. Procedura ligjore është ajo që është, numërimi dhe vlerësimi i fletëve të votimit është manual, por do të eksperimentojmë përdorimin e inteligjencës artificiale, për numërimin e fletëve të votimit si eksperiment dhe nuk do të ketë asnjë domethënie në rezultat, por do të shohim se si një aplikacion do të numërojë fletët e votimit në të ardhmen.

Kostoja e një vote shkon te 11 euro për votë, se nuk kemi votime nga jashtë për këto zgjedhje. Për votimin elektronik nuk është problem kostoje, mungesa e besimit të plotë të një pjese të votimit në këtë proces, ka bërë që të mos e aplikojmë votimin elektronik në shkallë të gjerë. Zgjedhjet e fundit kanë bindur edhe disa skeptikë, se në kuptim të integritetit që ka kjo mënyrë votimi, do ia vlente ta zgjeronim”, tha Celibashi.