Zgjedhjet vendore/ Korreshi: Në Lushnjë PD do të ketë vetëm një kandidat

Deputeti i Partisë Demokratike, Saimir Korreshi në një dalje mediatike në Ora Neës, ka folur në lidhje me zgjedhjet lokale të 14 Majit.

Korreshi ka theksuar se qyteti i Lushnjës nuk do të dalë me dy kandidatë cilido të jetë qëndrimi dhe pozicioni i të dyja palëve të PD.

“Deri në fund do jem i bindur se do realizohet. Me dy kandidatë do doja të ikja në tjetër shtet ose siç kanë bërë këtu disa kandidatë dhe zyrtarë tanë si të sëmurë, më dhemb veshi i mesit, më dhemb kurrizi, me 45 temperaturë. Por mesa kam folur me demokratët e Lushnjes, ne kemi kaluar një betejë shumë të ashpër sa nuk i shkojmë demokrati demokratit në xhenaze. Imagjino ku ka arritur inati mes demokratëve. Nuk jemi te Netflix që ta bëjmë me seriale. Morëm leksionin. Pavarësisht se unë që në 6 mars doja të dilnim me një kandidat, se gjetëm zgjidhjen.Tirana doli më e fortë se ne. Por kësaj radhe gjykoj se nuk do dalim me dy kandidatë në Lushnje”, është shprehur ai.