Zjarr i madh në Kotë të Selenicës, flakët afrohen pranë banesave

Një zjarr i përmasave të mëdha ka përfshirë mbrëmjen e 8 tetorit zonën përreth fshatit Kotë, në bashkinë Selenicë, duke krijuar shqetësim për banorët pasi flakët janë afruar pranë banesave.

Sipas të dhënave paraprake, zjarri është përhapur në kodrën që rrethon fshatin, duke përfshirë një sipërfaqe të konsiderueshme dhe duke rrezikuar të afrohet më tej drejt zonave të banuara.

Situata është bërë më e vështirë për shkak të kapaciteteve të kufizuara të shërbimit zjarrfikës të Bashkisë Selenicë. Bashkia ka kërkuar ndërhyrjen e mjeteve zjarrfikëse nga njësitë vendore fqinje për të ndihmuar në frenimin e flakëve dhe shmangien e përhapjes së tyre.

Në zonë janë nisur për ndihmë edhe mjete zjarrfikëse nga Himara, ndërsa vijon përpjekja për të vënë nën kontroll vatrën e zjarrit.

Për momentin, shqetësimi kryesor mbetet afrimi i flakëve pranë banesave dhe mundësia e përhapjes së zjarrit në zona të tjera përreth fshatit.