Cristiano Ronaldo tregon si ju lutën lojtarët e Romës që të mos i shënonte

Cristiano Ronaldo po përgatitet për ndeshjen e së shtunës ndaj Romës në kuadër të javës së 17-të në Serie A, dhe ka zbuluar se si iu përgjëruan dhe e kërcënuan lojtarët e Romës gjatë kohës kur ishte lojtar i Manchester United.

Portugezi ka zbuluar se në ndeshjen mes Unitedit ndaj Romës, lojtarët i kanë kërkuar atij që të ndalet dhe të mos i driblojë lojtarët verdhekuq.

Ronaldo ishte pjesë e Unitedit nga viti 2003 deri më 2009-ën, ku pastaj u largua në drejtim të Real Madridit.

“Kur ishte rezultati 6-0, ata më kërkuan mua që të ndalem. Një kundërshtar m’u përgjërua që të mos i dribloj më”, ka thënë Ronaldo për ndeshjen që e fitoi United me rezultatin e thellë 7-1 ndaj romanëve në kuadër të Ligës së Kampionëve.

“Të tjerët më kërcënuan se do të më lëndonin”, pohoi portugezi.

Hera e fundit që Ronaldo ka shënuar ndaj Romës është viti 2016 me Real Madridin në fitoren 2-0 në kuadër të Ligës së Kampionëve.