Valdrin Pjetri është leksioni i fundit i hidhur për Ramën por Basha….

Përditësuar më 16 Gusht 2019, 14:08

Valdrin Pjetri është leksioni i fundit i hidhur i Ramës  që më në fund ka  kuptuar se ligji i dekriminalizimit është bërë për t’i mbajtur larg politikës, të gjithë ata Valdrina,Ervina, Artura,apo Elvisëra,  që të fshehin të shkuarën e tyre. 

Pas  batërdisë që kryeministri bëri në katapultimin e ‘valdrinroshëve’ në nivele të larta të shtetit dhe pushtetit, duke e bërë faqen shollë me justifikime të neveritshme jo vetëm për socialistët e ndershëm dhe dinjitozë , por duke bërë qesharake dhe leckë edhe dinjitetin e shtetarit përballë të huajve.  Sot kjo dorëheqje shah-mat e Valdrinit me hotele e plot pasuri e ka carmatosur dhe e ka lënë në një cep plot llucë të nakatosur  Ramën përballë shqiptarëve dhe të huajve. Edhe Valin kishte mangut në këtë gusht përvëlues politik. Tepsia edhe pse gati  e boshatisur nga llokmat  për miqtë e Valdrinit, Gjushit, Vilmërave  dhe PPP-ve , duket si një kockë e   fortë që  i ka ngec keq kryeministrit në gurmaz dhe ndoshta ky është momenti  që  stërkalat e zullumit me gjithpushtetshmërinë e frikshme  të Edi Ramës ta bëjnë kaq pis, sa nuk do të mund ta rikuperojë  përvecse me gjeste të forta prej lideri. E kjo për Ramën thjeshtë është  e pamundur, prandaj duket se Bashës që kishte ngelur  anës Bunës pa ujë, Valë-Drini i dha një as të fortë moral para ndërkombëtarëve dhe qytetarëve të Shqipërisë.

A do të dijë ta shfrytëzojë jo më vetëm me aleatët opozitarë  por me intelektualët, pedagogët, mjekët, mësuesit, armatën  antikonformiste të shoqërisë civile, biznesin e vogël dhe të mesëm ndoshta dhe  të majtëve të lodhur, të na bindë me  një Platformë Kombëtare? A do  të mundet të kërkojë pa ekuivoke mbështetje dhe frymë. Frymën për të jetësuar një shtet të së drejtës, një formë  përfaqësimi dhe qeverisje me moral dhe jo mocal sic po e mbyll Rama?

Ndoshta akoma nuk është i vonuar  që  të mbledhë rreth vetes edhe të rinj universitarë, demokratë dhe ish-demokratë, rreth platformës së shpëtimit të shtetit dhe falimentit si komb.  Nëse do të vazhdojë që të presë sa të  trashet dhe shtohet zullumi valdrinian i Ramës , kjo është humbje jo vetëm për Bashën por jemi të dënuar të respektojmë  pa kushte poturet  e bardha  dhe nallanet e Edi Ramës. Sepse ai ende  beson  në zemërgjërsinë   e votave të socialistëve të thjeshtë. Ka ardhur momenti që të gjithë bashkë te mundim këtë moment të keq historik, duke përfshirë në platformë të gjithë  zërat e shëndoshë të shqiptarëve të vertetë, të cfarëdo bindjeje me një kusht; të mos jenë antishqiptarë, qelbësira, kriminelë dhe trafikantë.