Vrasësi i doli përballë/ Jashtë rruge dhe vrima plumbash në xham, pamje nga autobusi i masakrës në Kosovë

Tre persona u vranë nga të shtënat me armë zjarri në drejtim të një autobusi në afërsi të fshatit Gllogjan të Komunës së Deçanit. Të shtënat kanë ndodhur të premten, në orët e mbrëmjes.

Autobusi drejt të cilit ishte shtënë mbrëmë me armë zjarri raportohet se është akoma në vendin e ngjarjes, shkruajnë mediat  kosovare.

Janë publikuar edhe disa pamje ku shihen vrimat e plumbave në xhamat e autobusit që sipas policisë është gjuajtur me AK-47.

Nga ngjarja e mbrëmshme ka mbetur i vdekur shoferi i autobusëve dhe dy nxënës që ishin brenda.

Prokurorja Sahide Gashi në një deklaratë për mediat ka dhënë detaje rreth pistës së hetimeve për vrasjen e trefishtë gjatë natës së mbrëmshme në Gllogjan.

Ajo tha se janë intervistuar disa dëshmitarë dhe se ekipet hetuese janë në terren duke e ekzaminuar vendin e ngjarjes ku është kryer krimi.

Me shumë mundësi, ata nxënës po ktheheshin në shtëpitë e tyre, gjithë gëzim me mendjen se përpara kanë dy ditë pushimi, çlodhjeje. Ama, në asnjë moment s’do i kishte shkuar në mendje që ky kthim rutinë i tyre në shtëpi, do të ishte i fundit.

Nuk mundën as të takonin të paktën për herë të fundit familjarët e tyre. Të afërm e miq, akoma nuk e besojnë dot që një ngjarje gati a pakuptimtë, ende e pazgjidhur nga policia e Kosovës, i dha fund jetës së dy të rinjve në Pejë.

Autoritetet thonë se me gjasë objektivi i autorit të maskuar gjendej brenda autobusit, por përmasat e ngjarjes, me shumë mundësi jashtë parashikimit, morën trajtën e një sulmi terrorist.

Ledion Hamzaj dhe Gentiana Mustafaj, njëri 16 dhe tjetra 17 vjeç, janë dy viktimat e reja që ndoshta as nuk e dinë nga u erdhi dhe se si u larguan kështu papritur nga jeta.

Me siguri shumë ëndrra të lëna përgjysmë e shpirtra të shkatërruar familjarësh la kjo ngjarje e rëndë në fshatin e vogël Gllogjan të Kosovës.

“O zot, nuk mundem as të besoj as të imagjinoj që kjo ndodhi sot, vajza e dajës tim Florim, vajza e dajës tim i cili me plagë lufte në trup e tash me plagë të përjetshme në zemër, dajës tim që në liriiiii, për të cilën dha pjesë të tij ti ndodhë kjo plotësisht e shokuar”, shkruan kushërira e Gentës.

“Ka qenë 17-vjeçare shkonte shkollën e mjekësisë dhe ka qenë duke u kthyer nga shkolla. Ka qenë orari i shkollës dhe ky ka qenë orari që u kthy çdo ditë me linjë të autobusit, sikurse e kanë gjithë nxënësit. Familjarët janë të shokuar, dhe është një gjendje shumë e rëndë në familje. Ajo asnjëherë nuk ka folur për ndonjë telash për tek linja e autobusit. Dëshira e saj ka qenë të jetë një doktoreshë në të ardhmen,” tha ajo.

Samedin Mehmeti, drejtori i përgjithshëm i Policisë së Kosovës, tha se hetimet nga autoritetet lidhur me vrasjet në Deçan, janë përqendruar në tre pista kryesore, pa dhënë detaje se cilat ishin ato.