Përditësuar më 9 Janar 2025, 12:55

Spitali pa mjek kardiopediatër

Pas ngjarjes së rëndë, ku vdiq një 12-vjeçar nga Pocesta e Maliqit, Prokuroria e Korçës ka nisur hetime mbi shkaqet e ngjarjes.

Burime nga Spitali Rajonal i Korçës bëjnë të ditur se pas ndihmës sipas protokollit mjekësor, 12-vjeçari u transportua nga Spitali i Korçës për ekzaminime dhe ndihmë mjekësore më të specializuar në kryeqytet.

Saktësohet nga burimet që rasti është ndjekur me përparësi në spitalin e juglindjes nga personeli shëndetësor.

Por paraprakisht dihet që në Spitalin e Korçës nuk ka mjek kardiopediatër.

Sipas burimeve nga spitali, 12-vjeçari pasi ka pasur një stabilizim shëndetësor, më 31 dhjetor, me dëshirën e familjarëve dhe të tij, është larguar nga spitali.

Gjatë qëndrimit ai është mjekuar me antibiotikë, perfuzione dhe ilaçe për barkun. I gjithë mjekimi është ngritur mbi rezultatet e analizave.

Në datë 7, kur ai është paraqitur përsëri në urgjencën spitalore të Korçës, është bërë stabilizimi i gjendjes shëndetësore, edhe pse u paraqit në situatë shumë të rënduar në spital.

Për shkak të simptomave, të cilat janë të njëjta për disa diagnoza, u bë e mundur të niset në kryeqytet për mjekim të specializuar dhe për ekzaminime të thelluara shëndetësore.

Gjatë natës në spitalin e kryeqytetit, ai ka pasur përkeqësim të menjëhershëm të gjendjes së tij.