Një zbulim i jashtëzakonshëm po rishkruan historinë e shkretëtirës Rub’ al-Khali – e njohur ndryshe si “Çereku i Zbrazët” – që shtrihet ndërmjet Dubait, Arabisë Saudite dhe Omanit. Prej shekujsh e konsideruar një vend i pabanuar e i pamëshirshëm, tashmë po zbulon një të kaluar të pasur dhe të organizuar.Gjithçka nisi kur Sheiku Mohammed bin Rashid Al Maktoum vërejti nga ajri formacione të çuditshme dunash dhe një shtresë të errët nën sipërfaqe. Kjo çoi në zbulimin e vendit arkeologjik Saruq Al-Hadid, ku studiuesit zbuluan gjurmë përpunimi metalesh – kryesisht bakër dhe hekur – që datojnë afro 5 mijë vite më parë.Për të ndihmuar në eksplorimin pa dëmtuar terrenin, studiuesit nga Universiteti Khalifa në Abu Dhabi përdorën teknologjinë më të avancuar të radarit me hapje sintetike (SAR), që depërton në rërë për të zbuluar struktura të fshehura. Në kombinim me inteligjencën artificiale dhe imazhe satelitore me rezolucion të lartë, ata identifikuan rrugë, vendbanime dhe madje edhe mbetje kafshësh – dëshmi të qarta të një qytetërimi të zhvilluar në zemër të shkretëtirës.Ky zbulim ka risjellë në vëmendje legjendën e qytetit të humbur Ubar, të njohur në mitologji si “Atlantida e Rërave” – një qytet që thuhet se u përpi nga shkretëtira si ndëshkim hyjnor për arrogancën e banorëve të tij.Zyra Kulturore e Dubait ka miratuar tashmë nisjen e gërmimeve të reja në zonat e sapoidentifikuara. Dr. Diana Francis, nga Laboratori ENGEOS, theksoi se këto gjetje “po revolucionarizojnë mënyrën se si kryhen kërkimet arkeologjike në mjedise ekstreme”.Edhe pse sot Rub’ al-Khali është një nga zonat më të thata në Tokë, studiuesit besojnë se mijëra vite më parë ajo përjetoi periudha më të lagështa, me liqene të përkohshme që mbështesnin jetë të pasur bimore dhe shtazore. Nga një tokë që dikur shihej si e zbrazët dhe e pashpresë, Rub’ al-Khali po shndërrohet në një dëshmi madhështore të qytetërimeve të humbura, duke na kujtuar se historia shpesh fshihet nën sipërfaqe – në pritje për t’u zbuluar.
