Rinumërimi për Tiranën, Ilir Alimehmeti apo Erald Kapri

Në Pallatin e Sportit “Farie Hoti” po vijon numërimi i votave për qarkun e Tiranës. Sot është dita e dytë e rinumërimit, ndërsa dje u hapën 85 kutitë të bashkisë Kamzës nga 1282 në total që ka qarku i Tiranës.

Nga hapja e kutive rezultuan vetëm gabime të vogla, që nuk sjellin asnjë ndryshim për mandatet, por as në renditjen e kandidatëve në listë të hapur. Nga rinumërimi doli se PS kishte përfituar 42 vota më shumë, PD-ASHM kishte përfituar 19 vota më shumë, PSD 7 vota më shumë dhe Lëvizja Bashkë 1 votë më shumë.

Hapja i 85 kutive të para tregoi se partitë që kanë pasur numërues, PS (42), PD (19) dhe PSD (7) kanë marrë vota shtesë padrejtësisht, ose në kurriz të partive të vogla (-5 KEA e Bashës, -3 Mundësia e Shehajt), ose mes votave të pavlefshme.

A mund të ndryshojë diçka?

Në qarkun Tiranë, i vetmi mandat që mund të vihet në dyshim, është deputeti i dytë i partisë “Mundësia”, i cili nëse e humbet i kalon PD-së, dhe bëhet me 14 deputetë. Që kjo të ndodhë, duhet që nga rinumërimi i votave, të dalin 1200 vota në favor të PD-së ose 117 vota më pak për partinë e Agron Shehajt. Nëse këto vota ‘gjenden’, në parlament nuk hyn Erald Kapri, por Ilir Alimehmeti. Që Mundësia ta ruaje mandatin në kurriz të PS, kjo e fundit duhet të humbasë rreth 4500 vota.

Sa i takon betejës së brendshme të partive, të dy kampet kanë trafikuar vota brenda familjes. Ilir Alimehmeti ishte ai që kërkoi t’i hapen kutitë, por rezultoi se i kanë marrë deri më tani 4 vota. Edhe rivales së tij Jorida Tabaku po ashtu i janë hequr nga llogaria 11 vota, duke mos e zbutur diferencën prej 2400 votash që kanë mes tyre.