Dashi i nxjerr të gjjitha: Në PD ka njerëz pa rrogë që lëvizin me “Range Rover”

Ish-deputeti i Partisë Demokratike, Dashnor Sula, ka dhënë një deklaratë të fortë lidhur me gjendjen aktuale të opozitës, duke kërkuar riformatimin e plotë të PD-së dhe ndryshimin e lidershipit për t’i kthyer shpresën qytetarëve.

Sula tha se opozita ndodhet në një moment shumë të vështirë dhe se nuk është në rrugën e duhur për të përballur kundërshtarin politik.

“Nëse ti thua kundërshtari im politik është i korruptuar, duhet të jesh vetë kristal që ta sfidosh. Zgjedhjet e fundit treguan se target grupi ishte mbi 55 vjeç, ndërsa të rinjtë nuk dolën më të votojnë. U është vrarë shpresa,” deklaroi ai.

Sipas ish-deputetit, shumë figura brenda opozitës janë shkëputur nga realiteti, ndërsa ironizoi mënyrën e jetesës së disa prej tyre:

“Aty ka nga ata që marrin vetëm rrogën, ose nuk kanë pasur fare rrogë dhe lëvizin me Range Rover.”

Në fund, Sula komentoi edhe atentatin e rëndë pranë aeroportit të Rinasit, ku u vra Gilmando Dani, i njohur si krahu i djathtë i Emiljano Shullazit.

“Ngjarja është e rëndë, pavarësisht se kush ishte viktima. Detyra e shtetit është të sigurojë jetën e çdo qytetari. Duhet të kishte reagim më të shpejtë, sidomos për faktin që ndodhi në një zonë kaq të ndjeshme si aeroporti,” u shpreh Sula në emisionin ‘Studio Live’, duke shtuar se mungesa e reagimit të menjëhershëm tregon dobësinë e institucioneve të rendit.