Kërkojnë  forcimin e sistemit të drejtësisë në Shqipëri

Këshilli i Ministrave të Jashtëm të Bashkimit Europian ka nënvizuar rëndësinë thelbësore të pavarësisë së gjyqësorit në Shqipëri, duke përfshirë në mënyrë të posaçme Strukturën e Posaçme kundër Korrupsionit dhe Krimit të Organizuar (SPAK), si dhe nevojën për forcimin e mëtejshëm të rezistencës së sistemit të drejtësisë ndaj çdo forme ndërhyrjeje, qoftë të brendshme apo të jashtme.

Në konkluzionet e tij, Këshilli kujton se Shqipëria duhet të sigurojë mbrojtje efektive gjyqësore, si dhe zbatim të qëndrueshëm dhe të plotë të vendimeve gjyqësore, duke e konsideruar këtë element si një kusht kyç për funksionimin e shtetit të së drejtës dhe për procesin e integrimit europian.

Këshilli i BE-së mirëpret përparimin e bërë nga Shqipëria në luftën kundër korrupsionit dhe krimit të organizuar, duke e ftuar vendin që të ndërtojë më tej një histori të fortë dhe të qëndrueshme suksesi, si dhe të forcojë kapacitetet institucionale për adresimin efektiv të këtyre fenomeneve.

Në mënyrë të veçantë, Këshilli vlerëson rezultatet konkrete të arritura nga SPAK dhe gjykatat e posaçme, përfshirë hetimin dhe ndjekjen penale të rasteve të korrupsionit të nivelit të lartë, duke i cilësuar këto zhvillime si tregues pozitivë të funksionimit të reformës në drejtësi.

Gjithashtu, Këshilli mirëpret bashkëpunimin e ngushtë të Shqipërisë me agjencitë e zbatimit të ligjit të Bashkimit Europian dhe të shteteve anëtare, duke theksuar se ky bashkëpunim duhet të vijojë dhe të thellohet më tej, veçanërisht në fushën e hetimeve financiare.

Në përfundim, Këshilli riafirmon se kontrollet e forcuara dhe kapacitetet e konsoliduara për mbrojtjen e interesave financiare të Bashkimit Europian janë thelbësore dhe përbëjnë një prioritet të vazhdueshëm në marrëdhëniet BE–Shqipëri.

Ky qëndrim i qartë i Bashkimit Europian shihet si një mesazh i fortë politik dhe institucional në mbështetje të SPAK-ut dhe pavarësisë së drejtësisë, në një moment kur këto institucione janë në qendër të debateve dhe presioneve të brendshme politike.