Albin Kurti e thotë troç: Kosova dhe Shqipëria, dy shtete por një komb

Kryeministri i Kosovës, Albin Kurti, nga Forumi Ekonomik Botëror në Davos, ka vënë theksin te lidhjet e pandashme mes Kosovës dhe Shqipërisë, duke theksuar se, pavarësisht ekzistencës së dy shteteve dhe dy dokumenteve shtetërore, shqiptarët përbëjnë një komb të vetëm.

Kurti theksoi se ndarja institucionale nuk përkthehet në ndarje kombëtare, duke nënvizuar se identiteti dhe përkatësia janë të përbashkëta.

Duke iu referuar krahasimeve që bëhen mes Kosovës dhe Moldavisë, veçanërisht në kontekstin e ndikimit rus, kreu i qeverisë kosovare i hodhi poshtë këto analogji. Ai argumentoi se rrethanat janë thelbësisht të ndryshme, pasi Kosova nuk përballet me një realitet të ngjashëm me Transnistrinë.

“Në Kosovë, një skenar i tillë mund të kishte pasur peshë në veriun e vendit para disa vitesh, por sot ajo situatë është tejkaluar,” deklaroi Kurti, duke theksuar se sovraniteti i shtetit është konsoliduar.