Flamur Vezaj

Edhe pse në burg Lulzim Berisha, vijon të ketë gjurmën e tij në disa biznese në Tiranë dhe Durrës, duke u fshehur përmes emrave si, Luljeta Berisha, Kevin Bilali, Aurela Zela, Shkëlqim Kalemi, Ilir Bardhi e të tjerë.

Hetimet e çelura nga SPAK dhe Operacioni “Forca e Ligjit” nuk arritën të prodhonin një dosje gjyqësore për Lulzim Berishën, megjithëse në atë kohë pas denoncimeve ne media, Policia e Shtetit veproi me urgjencë duke sekuestruar disa depozita nafte në Durrës dhe mbi 16 pasuri.

Por tashmë një kallëzim i ri ka mbëritur në zyrat e SPAK, kundër Lulzim Berishës dhe motrës së tij, Luljeta Berisha.

Një material i kallëzuar nga një vajze 19-vjeçare nga qyteti i Durrësit, ka vënë në lëvizje prokurorinë e posaçme SPAK dhe Byronë Kombëtare të Hetimit, për të nisur një hetim penal kundër Lulzim Berishës, motrës së tij, Luljeta Berisha dhe lidhjeve të tyre shoqërore me të cilët administrojnë disa kompani dhe prona.

Lulzim Berisha, ish-i dënuari me 25 vite burgimpër disa vrasje në Durrës, aktualisht qëndron i izoluar në ambjentet e burgut të Peqinit, pasi ndaj tij SPAK, ka vendosur masën e sigurisë “Arrest në Burg” për rastin e vrasjes së Klodian Saliut, ngjarje kjo e ndodhur në Durrës në muajin Shkurt 2005.

Por pavarësisht qëndrimit të tij në ambjentet e qelisë, Lulzim Berisha, shumë punë të errëta jashtë burgut, i mbaron përmes motrës së tij që ka në Durrës, Luljeta Berisha.

Sipas burimeve për “MaShqip”, përmes shantazheve, korrupsionit, dhe presioneve, kjo e fundit është kthyer në terenin e Durrësit dhe jo vetëm, në “zonjën e Hekurt” të interesave ekonomike të vëllait të saj që ka në burg.

Përmes emrit të Luljeta Berishës dhe individëve prestanome të saj, janë rregjistruar disa biznese dhe prona të paluajtshme si kompani nafte, polici private dhe lidhje të tjera që çojnë deri tek ish-zv/kryeministrja e vendit, Belinda Balluku.

Prezenca e Luljeta Berishës shihet në disa vende në Durrës, ku së fundi interesi i saj është parë dhe tek një sipërfaqe toke mbi të cilën funksionon tregu ushqimor i Durrësit.

Kjo sipërfaqe toke mësohet të jetë rregjistruar në emër të një vajze 19-vjeçare, të cilës Lulzim dhe Luljeta Berisha, duan t’ia tjetërsojnë me pretendimin se kjo sipërfaqe toke është përdorur prej disa vite prej tyre.

Aktualisht për këtë çështje, disa ditë më parë prokuroria e Durrësit, ka nisur një kallëzim penal, duke hetuar në disa drejtime. Çështja mban Nr.595 dhe po hetohet për akuzën e “Mashtrimit”, “Fshehje të të ardhurave”, “Evazion fiskal” dhe “Pastrim të produkteve të veprës penale”. Ndërkohë një hetim penal ka nsiur dhe në SPAK.

Rrjeti i kompanive

Sipas verifikimeve të kryera rezulton se hija e të “fortit të Durrësit”, Lulzim Berisha, qëndron pas 4 kompanive tregtare dhe disa prona të maskuara përmes emrave të personave të tjerë.

Policia e Shtetit dhe Shërbimi Informativ Shtetëror, ka të dhëna të sakta se emri i Lulzim Berishës, qëndron pas policisë private “One Security”, policisë tjetër private “Enviklas”, shoqërisë tregtare të naftës “Rajan 2007”,shoqërisë financiare “Elite Finance-Consulting”si dhe një resorti turistik në zonën e Qerretit në Kavajë.

Megjithëse Lul Berisha qëndron në burg, në krye të këtyre kompanive qëndron motra e tij, Luljeta Berisha, e cila herë përdor emrin e saj, herë të shoferit të saj, Kevin Bilali dhe herë emra të tjerë si Aurela Zela, Ilir Bardhi, Shkëlqim Kalemi dhe persona të tjerë.

Lul Berisha nga burgu në biznes

I konsideruar nga Prokuroria e Krimeve të Rënda si drejtuesi i bandës së Durrësit, dhe më pas i deklaruar fajtor me 25 vite burgim nga Gjykata e Lartë, si pjesëmarës në disa vrasje, Lulzim Berisha, arriti të dalë nga burgu falë një vendimi të Gjykatës së Apelit Durrës, e cila e liroi atë me kusht, duke i hequr masën 6 vjeçare që duhet të bënte brenda në burg.

Lirimi i Lulzim Berishës nga ambjentet e paraburgimit të Durrësit, ka ndodhur në muajin Dhjetor 2016. Fiks dy vite pas daljes nga burgu, teksa ndodhej i liri dhe po vuante dënimin me kusht, Lulzim Berisha vendos të hapi një shoqëri tregtare në fushën e naftës.

Kompania e naftës “Rajan 2007” është hapur në 19 Shkurt 2019, ku Lulzim Berisha gëzonte 40 për qind të aksioneve, Luljeta Berisha 30 për qind dhe Enkelejda Shoshi 30 për qind.

Por në vitin 2020, përmes një kontrate shitje jo të deklaruar tek noteri, Lulzim Berisha vendos t’ia shesë aksionet Kevin Bilalit, që është shoferi i motrës së tij, Luljeta Berishës.

Sipas kontratës së shitjes, 40 për qind të aksioneve janë shitur tek Bilali, kundrejt 14 milion lekëve të vjetra. Ndërkohë 1 vit më pas, Enkelejda Shoshi, vendosi në muajin Maj 2021, të shesë jo para noterit, 30 për qind të aksioneve të “Rajan 2007” tek Luljeta Berisha, e cila pas kësaj periudhë dhe në vijim gëzon 60 për qind të shoqërisë së naftës.

Ndërsa pjesën tjetër prej 40 për qind të “Rajan 2007” e gëzon në letra shoferi i saj, Kevin Bilali. Ndërsa pjesë e kompanisë si ekspert kontabël janë Ramiz Kamami, Ylvi Hana dhe Drejtues Teknik, Ilir Bardhi.

Ndërkohë një kompani e dytë, e lindur njëherazi me kompaninë e naftës “Rajan 2007” dhe që ka dyshime se drejtohej në hije nga Lul Berisha, është shoqëria “One Security”, ku qëllimi ishte garantimi i sigurisë fizike ndaj institucioneve shtetërore, subjekteve private dhe jo vetëm.

Një polici private kjo, me qëndër në Durrës dhe e themeluar më 15 prill 2019. Fillimisht, themeluesit e kësaj kompanie rezultojnë të jenë Luljeta Berisha, motra e Lulzim Berishës dhe Armand Zela, një biznesmen nga Kavaja, që administron kompanitë për tregtimin e paisjeve elektronike “AZ-TECH” dhe “BÇ”.

Lidhjet me dy polici private

Por vetëm një muaj pas themelimit të policisë private “One Security”, me një kapital prej 350 mijë lekësh të vjetra, Luljeta Berisha dhe Armand Zela vendosin të braktisin kompaninë, duke e shitur më 20 maj 2019 tek shtetësja Aurela Zela, kundrejt një çmimi prej 35 mijë eurosh.

Por “One Security” është kompania që në 24 nëntor të 2019 është pezulluar si aktivitet nga Drejtoria e Përgjithshme e Policisë së Shtetit, pasi drejtori i asaj kohe Ardi Veliu, vendosi ti revokojë liçencën për shkak se kjo kompani kishte lidhje të drejtpërdrejtë me krimin e organizuar.

Administratorja prestanome e kësaj shoqërie Aurela Zela, kërkoi në rrugë ligjore të pezullonte efektin e urdhërit të Drejtorit të Përgjithshëm të Policisë, por nuk arriti të marë sukses në Gjykatën Administrative të Tiranës.

Mirëpo e ndodhur para faktit që në rrugë ligjore ishte e pamundur të vijonte aktivitetit me shoqërinë “One Security”, Luljeta Berisha, futet në marëveshje me Shkëlqim Kalemin, një ish-drejtor burgjesh.

Kalemi, më parë ka shërbyer si ish-drejtues i disa prej insititucioneve të vuajtjeve të dënimit në kohën e Partisë Demokratike, kohë e cila përkon dhe me vendet në të cilat ka vuajtur dënimin edhe Lulzim Berisha.

Përmes kësaj marëveshje dhe njohje, Luljeta Berisha arrin të riaktivizojë aktivitetin e pezulluar të policisë private. Përmes emrit të Shkëlqim Kalemit, krijohet shoqëria “Enviklas Security”dhe drejtues teknik është Ilir Bardhi ose siç njihet ndryshe në Durrës, “Liri i Fijes”.

Ajo qe vihet re në këtë rast është fakti, se ky aktivitet tregtar i “Enviklas Security” zhvillohet në të njëtën godinë ku më parë ka patur zhvilluar aktivitetin e saj, dhe policia private “One Security”.

Siç dhe mund të evidentohet nga ekstraktet bashkangjitur përkatësisht në nr. e pasurisë 3/201N1 ZK 8514, lagja 3 Bulevardi kryesor.

Dy polici private qe kane te njejten adresë ku ushtrojne aktivitetin tregtar

Gjithashtu të gjitha bizneset që kishin një kontratë për shërbimin e ofruar nga “One Security”, tashmë kaluan të gjitha tek “Enviklas”, dhe biznese të tjera gjitashtu, të cilat pranojnë se kontratat i kanë lidhur me shtetasen Luljeta Berisha.

Dhe se në çdo biznes atë e përfaqëson punonjësi Ilir Bardhi që në Durrës njihet si person që thiret “Liri i Fijes”.

Ilir Bardhi është drejtuesi teknik i “Enviklas security”. Por rezulton se ky person shfaqet dhe tek shoqëria e naftës “RAJAN 2007” si anëtar këshillit administrativ dhe drejtues Teknik.

Bilali, nga roje dhe shofer tek aksioner

Në qytetine Durrësit dhe Tiranë, Kevin Bilalinjihet si shoferi personal i Luljeta Berishës. Gjithashtu për mos tu lënë pas, vlen të përmendet se Kevin Bilali, sipas të dhënave të vitit 2021 rezultonte i punësuar si menaxher pranë kompanisë “Rajan 2007” dhe njëherësh si roje pranë kompanisë “Lura Security”.

Është e habitshme se si ky shtetas nga roje në një kompani sigurimi vendos të themelojë dhe jetë aksioner në kompani nafte me Luljeta Berishën dhe aksioner në një kompani tjetër me Jona Dushkun, vajzën e zv/Drejtoreshës së Përgjithshme të Doganave dhe motrën e Drejtoreshës së Kabinetit të Ministres, Belinda Ballukun.

Në shtator të vitit 2024 themelohet kompania tjetër “Elite Management”.

Pranë këtij biznesi i cili lidhet me shërbime doganore dhe fiskale janë bërë bashkë, fëmijët e dy punonjësve të Administratës Doganore si dhe Kevin Bilali, shoferi personal i Luljeta Berishës, motrës së Lul Berishës.

Sipas Aktit të Themelimit aksioner në këtë kompani janë Kevin Bilali 33.4 për qind të aksioneve, Jona Dushku 33.3 për qind të aksioneve dhe Eneo Kasa 33.3 për qind të aksioneve.

Ndërkohë siç rezulton dhe nga dokumentat, Kevin Bilali, është djali i Nazmi dhe Aida Bilali. Nazmi Bilali rezulton se punon si doganier pranë Doganës Kapshticë. Kurse Aida Bilali, rezulton e punësuar pranë Ujësjellës Kanalizime Durrës.

Edhe pse në burg Lulzim Berisha, vijon të ketë gjurmën e tij në disa biznese në Tiranë dhe Durrës, duke u fshehur përmes emrave si, Luljeta Berisha, Kevin Bilali, Aurela Zela, Shkëlqim Kalemi, Ilir Bardhi e të tjerë.

MaShqip.com