Ish-kreu i Policisë së Shtetit fiton betejën me Qeverinë në Gjykatën e Lartë

Gjykata e Lartë ka mbyllur përfundimisht betejën ligjore të ish-kryepolicit Gledis Nano me Këshillin e Ministrave dhe Ministrinë e Brendshme, duke vendosur në favor të tij dhe duke i dhënë një goditje që përkthehet në faturë për shtetin.

Vendimi lë në fuqi detyrimin që institucionet shtetërore t’i paguajnë Nanos dëmshpërblim, pas shkarkimit nga detyra, i cili u konsiderua i paligjshëm nga të gjitha shkallët e gjyqësorit.

Edhe Gjykata e Lartë ka rrëzuar rekursin e paraqitur nga qeveria dhe Ministria e Brendshme, të cilat kundërshtonin vendimet e mëparshme që i kishin dhënë të drejtë ish-drejtorit të Policisë së Shtetit. Nano ishte shkarkuar vetëm rreth 11 muaj pasi kishte marrë detyrën.

Ish-kryepolici e cilësoi që në fillim si të paligjshëm vendimin për largimin e tij, të marrë nga kryeministri dhe ministri i asaj kohe, Blendi Çuçi, duke iu drejtuar gjykatës për drejtësi, një betejë që tashmë rezulton e fituar në të gjitha hallkat.

Në thelb të çështjes ishte kërkesa e Nanos për shfuqizimin e vendimit nr. 580, datë 31.08.2022 të Këshillit të Ministrave, si dhe detyrimin e institucioneve për ta trajtuar me pagë deri në përfundim të mandatit 5-vjeçar, ose për ta sistemuar në strukturat e Policisë së Shtetit apo në funksione të tjera publike.