70 lëvizje në një muaj

Vetëm pak javë pas marrjes së detyrës, Skënder Hita ka ndërmarrë një valë të gjerë ndryshimesh në strukturën e Policisë së Shtetit, duke realizuar rreth 70 lëvizje në poste kyçe brenda një organizate që numëron mbi 12 mijë punonjës.

Tradicionalisht, ardhja e një drejtuesi të ri në krye të policisë shoqërohet me ristrukturime të thella në nivelet drejtuese. Megjithatë, këtë herë mesazhi ka qenë më i drejtpërdrejtë: performanca do të jetë kriteri kryesor i qëndrimit në detyrë. Gjatë takimeve të para në qarqe, Hita ka bërë të qartë se mungesa e rezultateve konkrete nuk do të tolerohet.

Procesi i ndryshimeve është zhvilluar në disa etapa dhe ka përfshirë kryesisht zëvendësdrejtorët në qarqet Tiranë, Fier, Lezhë, Shkodër dhe Elbasan. Paralelisht, ndërhyrje janë bërë edhe në strukturat qendrore, përfshirë sektorin e Antiterrorit dhe atë Operacional, si dhe në drejtoritë e kufirit, të cilat funksionojnë të ndara nga administrimi rajonal.

Megjithatë, hapësira e ndërhyrjes së drejtpërdrejtë nga drejtori i përgjithshëm mbetet e kufizuar në disa nivele. Drejtuesit e qarqeve janë emëruar përmes procedurave konkurruese, sipas ndryshimeve ligjore të viteve të fundit, çka e bën më të vështirë zëvendësimin e tyre pa një bazë të fortë ligjore. Në këto kushte, presioni për rezultate dhe ndëshkimi në rast dështimi mbeten instrumentet kryesore të ndikimit.

Një shembull konkret është rasti i Lezhës, ku ndërhyrja e strukturave të ardhura nga Tirana çoi në zbulimin e dy ambienteve ku zhvilloheshin lojëra fati. Ky zhvillim ndikoi drejtpërdrejt në largimin e drejtorit vendor, Islor Islami, i cili dha dorëheqjen pas ngjarjes.

Situata paraqitet e ngjashme edhe në nivelin e komisariateve. Ndërhyrjet kanë qenë të kufizuara dhe të fokusuara në raste problematike, si në Peqin, ku u zbulua një ambient i përshtatur për kultivim kanabisi, apo në Komisariatin nr. 2 në Tiranë.

Në një tjetër nivel, drejtuesit e katër departamenteve kryesore në Drejtorinë e Përgjithshme pritet të përzgjidhen përmes një procesi të ri konkurrimi. Ky mekanizëm mbetet i bllokuar që prej ndryshimeve ligjore të shtatorit 2024, ndërsa një procedurë e mëparshme u ndërpre pas padisë së ngritur nga Aida Hajnaj, e cila kërkoi rikthimin në strukturat e policisë. Sipas burimeve, procesi pritet të rihapet në muajin qershor, duke krijuar mundësi për emërime të reja në nivelet më të larta drejtuese.