Nuk ngrihej nga shtrati, nuk hante dhe nuk lahej

Detaje të reja tronditëse janë zbuluar gjatë procesit gjyqësor për vdekjen e legjendës së futbollit Diego Maradona, ku shtatë profesionistë shëndetësorë po përballen me akuza për neglizhencë në kujdesin ndaj tij.

Gati gjashtë vite pas ndarjes nga jeta të “El Diez”, në gjykatë dëshmoi masazhatori i tij personal, Nicolas Taffarel, i cili foli për gjendjen e rënduar fizike dhe psikologjike të Maradonës në ditët e fundit të jetës.

Sipas Taffarel, ish-kapiteni i Argjentinës kishte humbur dëshirën për aktivitetet bazë të përditshme dhe gjendja e tij po përkeqësohej pa ndërhyrje të mjaftueshme.

“Diego nuk ngrihej nga shtrati, nuk donte të hante dhe nuk donte të lahej”, deklaroi ai para gjykatës.

Masazhatori tha se kishte ngritur disa herë shqetësimet e tij te ekipi mjekësor dhe kishte kërkuar që Maradona të monitorohej çdo ditë, por sipas tij nuk kishte parë masa konkrete.

“I bëra të ditur problemet që shihja tek ai, por nuk pashë veprime konkrete dhe as një zgjidhje të shpejtë”, u shpreh Taffarel.

Ai tregoi se Maradona ishte në gjendje të dobët fizike, me ënjtje në trup dhe këmbë. Sipas tij, mjekët e qetësonin duke i thënë se situata do të përmirësohej, por kjo nuk ndodhi.

Gjatë dëshmisë, Taffarel foli edhe për takimin e fundit me Maradonën, më 24 nëntor 2020, vetëm një ditë para vdekjes së tij. Ai tregoi se i kishte propozuar të pinin një mate, por futbollisti e kishte refuzuar.

“‘Nuk dua asgjë, Taffita, mjafton kështu’. E pyeta se çfarë donte të thoshte dhe ai më tha: ‘Asgjë, mjafton kështu’”, rrëfeu masazhatori.

Këto fjalë kanë marrë vëmendje të veçantë gjatë procesit, pasi shprehja spanjolle “ya está” mund të interpretohet në mënyra të ndryshme, nga “mjafton” deri te një kuptim më i errët në kontekstin e vdekjes së tij.

Çështja gjyqësore po përqendrohet te rrethanat e orëve të fundit të jetës së Maradonës dhe nëse ekipi mjekësor ka dështuar në detyrën e kujdesit ndaj tij. Ekspertizat mjekoligjore kanë ngritur dyshime se ai mund të ketë vuajtur për një periudhë të gjatë para se të ndërronte jetë.

Shtatë të akuzuarit, pjesë e ekipit që kujdesej për Maradonën, mohojnë përgjegjësinë dhe pretendojnë se kanë vepruar sipas kompetencave të tyre. Nëse shpallen fajtorë, ata mund të përballen me dënime të rënda.

Procesi pritet të vijojë me dëshmi të tjera, ndërsa gjykata përpiqet të zbardhë një nga çështjet më të diskutueshme që ka shoqëruar vdekjen e një prej figurave më të mëdha të historisë së futbollit.