20-vjeçari kapet me armë në makinë, arrestohet nga policia

Një 20-vjeçar është arrestuar në Tiranë, pasi gjatë kontrollit të automjetit me të cilin po udhëtonte, policia i ka gjetur një armë zjarri pistoletë dhe municion luftarak.

Ngjarja është regjistruar në rrugën “Kastriotët”, ku specialistët për Hetimin e Krimeve të Komisariatit të Policisë Nr. 3, pas informacioneve të siguruara në rrugë operative, kanë ndaluar për kontroll automjetin që drejtohej nga i riu me inicialet S. D., banues në kryeqytet.

Gjatë kontrollit, efektivët kanë konstatuar armën e zjarrit dhe municionin luftarak, të cilat janë sekuestruar në cilësinë e provës materiale. Pas këtij konstatimi, 20-vjeçari është arrestuar në flagrancë.

Ndërkohë, në kuadër të veprimeve hetimore është kontrolluar edhe banesa e tij. Gjatë këtij procesi, dy familjarë të të riut, A. D., 51 vjeç, dhe L. D., 23 vjeç, kanë kundërshtuar punonjësit e Policisë, me qëllim pengimin e kryerjes së kontrollit.

Për këtë arsye, të dy janë proceduar penalisht në gjendje të lirë.

Materialet procedurale për rastin i janë referuar Prokurorisë, e cila do të vijojë veprimet përkatëse për zbardhjen e plotë të rrethanave.