Alarm në Burgun e Burrelit: Dron fluturon mbi institucionin, dyshohet për veprimtari kriminale

Në një incident të paprecedentë, një dron është konstatuar duke fluturuar mbi burgun e sigurisë së lartë të Burrelit, duke vënë në alarm sistemin e sigurisë. Policia ka ndërhyrë menjëherë, por nuk ka gjetur sende të paligjshme të transportuara me mjetin fluturues. Sipas Drejtorisë së Burgjeve, ky nuk është një rast i izoluar, por një pjesë e përpjekjeve të vazhdueshme nga grupe kriminale për të marrë pamje nga brenda institucioneve të sigurisë së lartë.

Në një deklaratë , Drejtoria e Burgjeve theksoi se droni mund të jetë përdorur për të mbledhur informacione të rëndësishme për futjen e sendeve të ndaluara në burg. “Në bashkëpunim të ngushtë me organet ligjzbatuese, u ndërmorën masa të menjëhershme për të neutralizuar çdo përpjekje të mundshme,” thuhet në deklaratë.

Drejtoria e Burgjeve konfirmoi gjithashtu se incidenti është në hetim, dhe pajisja fluturuese është dërguar për ekspertim. Hetuesit do të përpiqen të zbulojnë gjurmët e përdoruesve përmes analizës daktiloskopike dhe të dhënave teknologjike të dronit, duke përfshirë numrin IMEI.

Incidenti vjen në një kohë kur ende nuk është zbardhur plotësisht ekzekutimi i një të dënuari në burgun e Peqinit rreth 9 muaj më parë, duke ngritur shqetësime për sigurinë në burgjet e sigurisë së lartë.