Alarmi nga Manjani: Ndryshimet në Kodin Penal mbrojnë bandat!

Juristi Ylli Manjani komentoi ndryshimet e fundit në Kodin Penal, duke u ndalur veçanërisht te pika 7 e nenit 28, e cila parashikon përjashtim ose lehtësim të dënimit për pjesëtarët e organizatave kriminale që japin ndihmesë për drejtësinë.

Sipas Manjanit, mënyra se si është formuluar kjo dispozitë krijon një efekt të kundërt nga ai që pretendohet, pasi në praktikë nuk i nxit anëtarët e grupeve kriminale apo terroriste të bashkëpunojnë me organet e drejtësisë.

Ai theksoi se, duke iu referuar tekstit të miratuar – i cili sipas tij duket se përputhet me projektligjin e depozituar në Parlament – krijohet përshtypja se bashkëpunimi nuk sjell përfitime reale për të akuzuarit. Manjani shtoi se edhe vetë miratimi përfundimtar i dispozitës kërkon verifikim të kujdesshëm, duke qenë se, sipas tij, në kohët e sotme nuk ka gjithmonë siguri absolute mbi versionin final të akteve ligjore.

“Nëse neni ka dalë kështu nga Parlamenti, atëherë mesazhi që u përcillet pjesëtarëve të grupeve kriminale është i qartë: mos bashkëpunoni, sepse nuk do të përfitoni asnjë ulje dënimi”, u shpreh ai në emisionin “Now”, duke shtuar se kjo çështje nuk mund të shihet e shkëputur nga dispozitat e tjera të Kodit Penal.

Manjani nënvizoi se një analizë e plotë kërkon kohë dhe krahasim të nenit 28 me pjesë të tjera të ligjit, pasi situata nuk është aq e thjeshtë sa duket në lexim të parë. Ai solli gjithashtu në vëmendje se sistemi i bashkëpunëtorëve të drejtësisë në Shqipëri ka rezultuar problematik ndër vite.

Sipas tij, shumë prej rasteve të bashkëpunimit me Prokurorinë, përfshirë edhe SPAK-un, kanë përfunduar me deklarime të rreme, të paverifikuara ose mashtruese, duke e kthyer këtë mekanizëm në një nga dështimet më të mëdha të sistemit të drejtësisë në vend.